benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La posizion de Bepe Detomas sun la lege 482/99
scrit ai 14 November 2004 da les 08:49:06 da noeles

Politica

 

L articul 3 fotografeia la situazion di Ladins y pieta soluzions

"Sce na comunité de mendranza viv despartida soura deplú provinzies o regions, pòl vegní istituí organisms de coordinament y de proposta ... " - La Region Trentino-Südtirol essa bele dadie podú fé deplú - Sen él la lege 482/99 che sburla 

La lege statala n. 482 dl 1999 sun la sconanza dles mendranzes linguistiches é steda, do da 50 agn, na pruma atuazion dl art. 6 dla Costituzion taliana. Ala se trata de na lege dadie speteda tl ordinament statal do che al fova vegnú fat n grum de propostes. Ala preveid mesures fondamentales desche: l dert de adoranza dl lingaz tles relazions con la aministrazion publica, l ensegnament dl lingaz y dla cultura tles scoles, sostegns finanziars per l'editoria y la difujion de programs che adora n lingaz de mendranza. La lege é vegnuda penseda y calibreda per mendranzes che ne á mai giaudú de n sistem de sconanza, ma chest ne ti tol nia meric a la lege che veid dantfora en valgugn ponc inovatifs y plu avanzés de chi prevedus enfin a sen ence per mendranzes bele sconedes da statuc provinziai y regionai te en valgunes regions a d'autonomia speziala.

L parlamentar fascian Bepe Detomas.



Per chest motif án vedú dantfora l articul 18: "Nelle regioni a statuto speciale l'applicazione delle disposizioni più favorevoli previste dalla presente legge è disciplinata con norme di attuazione dei rispettivi statuti”. Defat s'á les does provinzies autonomes de Trent y de Bulsan ativé con does propostes de normes de atuazion desvalives per trapone en valgunes prescrizions che fajova enfin a sen pert dl corpus normatif dla sconanza di ladins. Chest vel per ejempl per l´adoranza dl lingaz ladin dant dal vicar de pesc, la poscibelté reconesciuda de stipulé convenzions con trasmetitours radiotelevisifs privac y publics per enjigné programs ladins, a la traduzion de ac normatifs emanés da la provinzia, al trascrive i inoms te sia forma originara.
Samben n'él nia dagnora saurí definí ciuna che á la norma "più favorevole" per la mendranza y per sia sconanza y sia valorisazion. La valutazion é discrezionala y baseda gonot demé sun criters sogetifs. Per chesta gauja él vegnú introdut tles medemes normes de atuazion na disposizion de "scluta" che stabilesc che al vegn te vigni caje apliché tles provinzies: “le norme di tutela delle minoranze previste dalla legge 15 dicembre 1992, n. 482, in quanto più favorevoli rispetto alle norme vigenti nella medesima provincia”.
Tl grem dla "Comiscion di 12" s'àn dessegur anadé, tl elaboré les normes de atuazion, dl fat che tla lege 482 é l terz coma dl articul 3, che fotografeia avisa la situazion di Ladins, la pert plu interessanta per i Ladins: “Quando le minoranze linguistiche di cui all'articolo 2 si trovano distribuite su territori provinciali o regionali diversi, esse possono costituire organismi di coordinamento e di proposta, che gli enti locali interessati hanno facoltà di riconoscere.” Chest articul pò veramenter daurí prospetives nueves per i Ladins. La dezijion de ne prevedei endere net nia a livel de norma de atuazion é vegnuda deteda dal fat che les provinzies autonomes de Trent y de Bulsan y la Region Trentino-Südirol-Alto Adige giaud de na autonomia legislativa per cie che reverda l ordinament di enc locai y per chel éssela te vigni caje podú fé na lege o tó provedimenc tla materia, ence zenza la previjion de na norma spezifica de atuazion y che essa abú valenza teritoriala tla region.
La comunité ladina, almanco chela che viv tla Region Trentino-Südtirol, pò se dí una dles mendranzes plu sconedes tl'
Europa, ma con sistems y ordinamenc che respon a filosofies y a conzezions desvalives, samben  ne vel chest nia per les normes scherses che reverda i ladins tla provinzia de Belun. Sce an se fej bele ert che la comunité ladina é tant picera, méssen enjonté l fat che i implanc normatifs de sconanza é frut de 3 politiches linguistiches desvalives. La atuazion dl articul 3 podessa daidé devenje, almanco en pert, problems y dejavantajes che la comunité ladina enconta, sian na ijola linguistica assolutamenter minoritara y en plu despartida su te trei realtés politich-aministratives desvalives, zenza degun coordinament y zenza deguna prospetiva de politica unitara per cie che reverda sia cultura y sie lingaz. Samben vel chest per les istituzions regionales, provinziales y comunales. An ne dess nia se desmentié via che ti agn passés él sté unions á sostegnú con forza l debujegn de na politica linguistica unitara, de provedimenc adatés de valorisé chi elemenc de identité che viventeia la coscienza dl popul ladin. Te chest cheder spizola fora la Union Generala di Ladins dles Dolomites con sies sezions de val che á tegní pro l'unité ence ti momenc plu riei y paian sies mueies taloutes con l ostrazism dles istituzions.
An ne pò nia auter che ester plenamenter a una con l'istituzion  de n organism de proposta y de coordinament desche prevedú da la lege 482/99. Ala se trata de n vare significatif inant per devenje i confins, che despartesc ingiustamenter y ilogicamenter la comunité ladina, y per scomencé a elaboré na strategia deberieda. I temesc sun chi che al paia la mueia na colaborazion anter i comuns ladins é cotanc: da la gestion dl teritore, al trasport, da l'economia a la cualité de vita, da les politiches per i joegn a la formazion dles classes dirigentes. Dessegur deura la lege na poscibelté y ti lascia ai comuns, a les provinzies y a les regions la facolté concreta de individué i sogec che pò ester plu de un, sun materies y con competenzes desvalives, a chi che an pò ti reconesce funzions de proposta y de coordinament. Samben, la logica dijessa che i prums che auda da vegní reconescius sie chi organisms y cheles assoziazions che opereia bele tla realté souraprovinziala y che á madurí tl temp esperienzes, profescionalité y credibelté. A la Union Generala di Ladins dles Dolomites, messéssel ti vegní reconesciú n rodul emportant, nia demé desche editoura dl soul organ de stampa interladin, ma ence desche assoziazion culturala che laora da diejenes de agn soura i confins. fora.
Sce an ratessa depierpul  de ti sourandé la enciaria a n soul organism i podeis de coordinament y de proposta, podessa sia composizion prevedei la partezipazion, fosc tres comiscions consultives, nia demé di ombolc, ma ence di raprejentanc de cheles assoziazions y organisazions caraterisedes da n'ativité souraprovinziala y souraregionala al servisc dla comunité ladina. Te vigni caje vál debujegn per ne spaterlé nia competenzes y esperienzes. Les aspetatives entourn chest organism é cotantes. La speranza é chela che al posse pié via endretura, dan l'idea che al sie valch che deide veramenter tegní adum i ladins, lascian da na pert pregiudizes politics y ideologics.

Bepe Detomas


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc