benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Dai Fats e de culture des tieris Ladins
scrit ai 10 November 2004 da les 19:30:11 da noeles

Friul


Lois Craffonara tal ciastel de Ermis de Colorêt

Articul souranout dal mensil "Ladins dal Friûl"

Lois Craffonara in cunvigne tal cjscjel dal innomenât poet furlan Ermis di Colorêt. Chest al è sucedût ai 9 di utubar stât intant dal incuintri interladin che si è davuelt justeapont tal cjscjel di Colorêt di Montalban, vuê sede de Comunitât dai Cuei dal Friûl disore. Organizât par cure de Comunitât dai Cuei e dal Circul Culturâl Laurenzian di Buje, oltri che cul patrocini de Provincie e da l'Universitât di Udin, de Societât Filologjiche e da l'Union Scritôrs Furlans, l'incuintri ch'al veve par tem "La Culture Ladine", si è zovât come reladôrs di Renzo Balzan, scritôr e diretôr-redatôr dal sfuei "Ladins dal Friûl", dal dr. Zuan Frau da l'Universitât di Udin, e naturalmentri dal dr. Lois Craffonara, ch'al à vût cussì ancje l'ocasion di presentâ al numarôs e cualificât public la sô antologjìe interladine "Flus" (Flus Leterares dl Grijun y dl Friûl).



"Mi sta a cûr sotlineâ achì vuê che i rapuarts tra lis realtâts dal mont ladin a vebin d'infuartîsi simpri di plui". In cheste maniere Craffonara al à daviert il so referât, fevelant tun furlan ch'al podarès jessi di esempli a tancj furlans che la marilenghe la dòprin pôc e mâl, ossei simpri plui a messet di talinisims e ch'a fâsin vignî l'urtiarie, a scomençâ naturalmentri di cierts sorestants che cuant che si fâsin intervistâ par television o par radio te nestre lenghe a dìsin, o miei a inventin, peraulis ch'a fàsin dome ridi, se no si vès di vaî a pensâ ch'o sìn rapresentâts di une blave di cheste sorte.

Lant indenant, Craffonara al à po sclarît ch'al è di agns che si fevele di programs cumuns tra lis regjons ladinis dal Friûl, des Dolimits e dal Grison, ma, cun dut chel il sfuarç di un pôs di passionâts nol è mai mancjât, e je vignude a mancjâ invezit une colaborazion, sore il dut fra lis instituzions, fondade su la concretece e la continuitât. Secont il glotolig originari de Val Badie (al è stât par agns a dilunc diretôr dal Institût Ladin "Micurà de Rü" di San Martin de Tor e curadôr de riviste "Ladinia"), lis associazions culturâls ladinis plui significants a varessìn di cjatâsi e confrontâsi ogni an, spostant a rotazion ju incuintris te tre regjons, par podê imbastî progèts cumuns, fasìnt dutun in chel tesaur des esperiencis pusitivis madressudis in ogni sengule realtât. Par chel che s'inten la formazion e la preparazion dai docents ch'a varàn d'insegnâ la marilenghe tes scuelis, i furlans a podaressin zovâsi in maniere vantazôse des esperiencis zà puartadis indenant sun chest cont tes scuelis dal Sud Tirôl dulà che di agns in ca s'insegne il ladin. Mentri des buinis esperiencis de cinematografie furlane par furlan, a podaressin zovâsi i ladins dolomitants ch'a stan scomençant a imbastî lis primis esperiencis di cheste originâl (e cetant preseade dai zovins) espression artistiche.

Tornant a bati il claut su lis cjossis concretis, Craffonara al à prudelât ancje une metude in rêt tra i media ladins (chest par esempli al sucêt bielzà tra Noeles.net, Ladins dal Friûl , La Patrie dal Friûl e La Quotidiana). Ma nol à lassât fûr ju aspiets economics. Lis regjons dolomitane e grisone, infats, a rapresentin un model sèi par chel che s'inten il svilup de mont (ancje a cuotis relativamentri altis), ch'al podares jessi metût in vôre chenti par slaifâ il spopolament des vals cjargnelis, sèi sul cont da l'organizazion dal setôr turistic. Cjapànt po la dade de publicazion de sô antologjìe "Flus Leterares dl Grijun y del Friûl" al à proponût l'instituzion di un premi leterari interladin, ch'al puedi zovâ al confront e al sgambi di esperiencis leterariis e culturâls.

Lois Craffonara al è passât infin a dâ une cercje de sô opare, penge 464 pagjinis e dulà ch'o cjatìn, te traduzion dal ladin de Val Badie, i plui innomenâts e significatîfs autôrs de Furlanie e dal Grison.  Nol podeve no scomençâ dal "paron di cjase", ossei di Ermis doi Colorêt (1622/1692). Dal cont-poet al à proponût "Chël tich y tach" (Chel tic e toc) : Chël tich y tach cumpëda vign' momënt/ i pasc che l' tëmp mosöra a nosc dann,/ debota y chît passan dal dé al ann,/ nes condujon te n cört al Monumënt…Âtris poets furlans ch'al à proponûts une cercje a son stâts Fidrì Tavan, Vitori Cadel  e Fidrì Comelli. Di sotlineâ inmò che l'incuintri al è stât indelegrât des musichis de tradizion popolâr ladine-dolomitane sunadis dal duo "I Pazedins", ch'a divignivin di Ciampedel in Val di Fascia. (edelweiß)
 
Dal sit internet : http://www.ladinsdalfriul.org/


 
Liams emparentés
· Deplú sun l tema Friul
· Chier te noeles


L articul plu liet te chest tema Friul:
Fieste Ladina y IV Colloquium Retoromanistich: program


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Cultura

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.460 seconc