benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Publicazions nueves: les mudazions te Ampez da do la Vera
scrit ai 24 October 2004 da les 11:22:18 da noeles

Cultura


Les bries de Ampez per s'uní ai Ladins 

N liber nuef de Manuela Zorzi fej na cronistoria da do la Vera encá - La vueia de vegní "con Südtirol" y sia ambivalenza

La Storia di un'utopia - Manuela ZorziLa Union di Ladins d'Ampez à dé fora da puech n bel liber entitolé "Storia di un’utopia. Dal primo conflitto mondiale al referendum mancato del 92, come è cambiata la Comunità Ladina d’Ampezzo. Sogni e reali possibilità si mescolano in un futuro di possibile riunificazione." Al é na tesa de laurea de na joena, Manuela Zorzi, nasciuda a Padova tl 1972, laureeda te soziologia che viv da n valgugn agn a Cortina olàche ala laora desche enfermiera.



Bele dal titul capéscen l argoment cernù fora da l'autoura. Na tematica de atualité, che tourna daspes ence sun la stampa locala, ma che chilò é vegnuda metuda sot forma de cronistoria, con n valgunes consciderazions che sauta fora damprovia. Na pruma pert conta dla storia dl popul ladin, da les prumes popolazions che á vivú sun chestes montes, enfin a nosc dis. La seconda pert, chela plu nueva y enteressanta, met adum y paredleia dut chel che al é suzedù da do la pruma vera via n'Ampez, ma de refles spo ence ta Fodom y ja Col, sun l tema dla reunificazion con les vals ladines dl Adesc Aut. Damprovia végnel reporté articui de foliec, referimenc a deliberes di comuns, fac de cronaca, che fej capì endertura coche revendicazions storiches, culturales, politiches y economiches s’ae encroujé tla chestion dla "vueia de Sudtirol" di trei comuns ladins storics sot a Belun. La Zorzi ilumineia ence la famousa (y melgestida) storia dl referendum dl ’92, con l dossier Zeller – Carrozza fat enjigné sun enciaria dl’aministrazion ampezana. Al essa messù vegní dé fora a Cortina per conesce les rejons per jì con Bulsan o resté con Belun, ma ne é mai vegnú fat conesce. Ala conta de dutes les reunions y dles scomenciadives per se arvejiné ai ladins da lafora. L’adejion di comuns a "l’assoziazion per l mudament de Region", la domanda a Aunejia de leges de sconanza, la costituzion dl moviment politich Ualcaf y enscí inant. L argoment vegn traté con obietivité, ence canche ala ruva pro argomenc plu damprò, desche la chestion di neo-ladins y les spentes dla provinzia de Belun per n’autonomia da damané propi sun la basa de chesta "proliferazion ladina".

Da sotlinié en particolar n valgunes domandes che l'autoura se fej a la fin dl liber. "Percie á pa empermò chesta norma (la lege 482/99 n.d.r ) descedé l am ladin de trueps raions dla provinzia de Belun , canche a nia ova joé i sforc de chest vers te agn de batalies di trei comuns ladins storics? Ala ne met nia en discuscion che la Ciadoura podessa ester ladina, ma la desferenza sostanziala de temp y de modes da canche an s’à ativé. Percie demé sen che al é na lege y nia da enlaouta, canche do la Pruma Vera fòvel sté les prumes revendicazions ( ladines n.d.r. ) ? I "ladins de Belun", scluj ju l’autoura", per avei sia credibelté messessa chirì te d'ei enstesc les rejons de sia ladinité y nia smaté revendicazions che ne é nience sies. Tant de plu che les revendicazions cor sun stredes che ne se encontarà mai." Ne se l ái mai damané chest chi che via per la Ciadoura y ju per l Agordin met fora, zenza se damané o savei sie significat storich, la bandiera ladina?

Lorenzo Soratroi.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.406 seconc