Enrescida sun la mujiga popolara dla Val Badia
Metuda adum tl liber "Oláche al rondenesc" da Barbara Kostner y Paolo Vinati y deda fora dal Istitut Ladin
Na publicazion nueva che raprejenteia na documentazion d'utl per la cultura ladina é dantman. Al é l liber con CD “Olache al rondenesc” de Barbara Kostner y de Paolo Vinati. Ala se trata de na racoiuda y analisa de cianties y de mujighes tradizionales dla Val Badia. I doi autours dl liber à studié etnomusicologia al Dams de Bologna y à bele fat n valgunes archirides sun l cianté tradizional.
Ai á ence scrit libri sun l argoment (per ejempl l liber sun les cianties religiouses tradizionales a La Pli de Mareo de Barbara Kostner). La publicazion nueva é pert de na archirida sistematica sun la mujiga popolara dla Val Badia porteda inant ti ultims agn da Barbara Kostner y da Paolo Vinati sun enciaria dl Istitut Ladin “Micurà de Rü”. Barbara y Paolo à tout su contat con persones y families olache la tradizion orala dl fé mujiga é ciamò viva, les à encontedes te ciasa, tratant festes o d’autres ocajions y à registré i toc portés dant. Ai à abiné adum n repertore rich de cianties religiouses y profanes, rimes y juesc per mutons, cianties de cuna, cianties da filé, cianties rituales, orazions, toc strumentai y intervistes sun les modalités dla esecuzion di toc y sun i momenc dl “fé mujiga”. Les registrazions pò vegnì consultedes tla biblioteca dl Istitut Ladin. La publicazion “Olache al rondenesc” tol ite 60 toc registrés, anter chisc él ence n valgunes registrazions fates ti agn '40 da Alfred Quellmalz y ti agn '60 da Helga Dorsch. Pro vigni toch él na picera descrizion y la trascrizion di tesc’. Abelì vegn l liber da fotografies di ciantarins y di musizisć che à dé n gran contribut a la realisazion dl projet depierpul che ai porta dant i toc. L liber contegn en plu na analisa dl cianté y dl soné tradizional dla Val Badia y mostra su desche i documenc sonours abinés adum é l spiedl dla storia y dla realté tipica de nost raion, olache deplù lingac s'enconta. Dal repertore veiden tamben che la tradizion ne sta nia chieta, ma che ala se muda damprovia tolan su toc nuefs. La publicazion vegn deda fora dal Istitut Ladin adum con l editour “Nota” de Udin, che dà fora na seria de libri con CD olache al vegn abiné adum la tradizion dles mujighes popolares de truepes regions talianes. “Olache al rondenesc” vegnirà prejenté en sabeda, ai 30 de otober da les 17.00 tl Istitut Ladin a San Martin de Tor con i autours dl liber, l prof. Giacomo Fornari y n valgugn di joblers di toc registrés.
Ulrike Frenademez
