benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Laours de restaurazion tl museum nazional de Kabul
scrit ai 20 October 2004 da les 08:15:27 da noeles

Cultura


L artist Hans Rindler d'Al Plan a Kabul

Co éla pa ruveda tant inant? Co laora pa n restauradour? Co ti dìjen pa a "ciauc" per persian modern?

Hans Rindler d'Al Plan de MareoDe november 2003 à la Sozieté Austro-Afgana enciarié - sun consei dl Prof. Dr. Max Klimburg, n etnologh dret conesciù - l artist Hans Rindler d'Al Plan de Mareo de fé n stude soura la fatibelté de n restaur de deplù statues dl museum nazional de Kabul, che é gnudes devastedes dal regim di Talibans. De mei 2004 à spo Hans Rindler sourantout l'enciaria de restauré 14 scultures de legn dl Nuristan. Sayed M. Raheen, l minister dla cultura dl Afganistan, s'à declaré dret content con l laour fat dal artist marou.



De november 2003 á la Sozieté Austro-Afgana enciarié l artist Hans Rindler d'Al Plan de Mareo da studié sun l post, tl museum nazional de Kabul, tant inant che al fossa sté meso da restauré deplù scultures de legn, che fova gnudes desfates aposta dal regim di Talibans. De mei 2004 éla spo steda tant inant. Do che la fatibelté dl restaur fova gnuda valuteda positivamenter, é Hans Rindler jolé a Kabul adum con l Prof. Dr. Max Klimburg, n etnologh conesciù y gran espert dl Afganistan. Per i laours de restaur él gnù prevedù endut cater edemes. Dles statues réstel demé plu zacotanc de spedic, do che i Talibans ova fat - tl dret significat dla parola - legna adenfora. Per fortuna ova n vardian almanco pensé da cueie adum i toc y da i mete a salf te n valgugn sac. I Talibans ova denant ciamò mescedé sotissoura duc i spedic, a na moda che al ne fossa nia plu sté meso da fé na recostruzion - n'azion barbarica contra la cultura veramenter programeda enfin tl menù.

Co éla pa ruveda tant inant?
L Afganistan é sté per secui l raion de passaje dl comerz con l'India, l Iran y l'Asia zentrala. Enscì él ence ruvé adum truepes operes d'ert de vigni era dla storia dl'Asia zentrala, a mete man da la preistoria. L museum de Kabul vegniva raté l plu reprejentatif per la storia dl'Asia zentrala, ence dilan a la donazion Bagram, les escavazions archeologiches dla fortificazion de Kushan y sia gran racoiuda de moneides storiches.
statuta dl museum de KabulTl 1993 é na gran pert di esponac dl museum vegnus desdruc da les bombes. Ence i implanc d'alarm é vegnus ruinés y ne pitova perchel plu deguna segurté contra i leresc. Apeina l ann do, dl 1994, ti à l'UNO finanzié al museum portes y fenestres nueves. Les robaries é endere judes inant: dl 2000 fova perchel l numer di esponac dl museum ju zeruch dl 90%. De merz 2001 à spo l regim di Talibans tout la dezijion da desdruje - con la vertola dla religion - dutes les statues che jiva endò al temp pre-islamich (dant al 632 d. Ch.). Chesta sentenza vandalica revardova ence truepes statues dl Nuristan (na provinzia tl sud dl Afganistan ) che rafigureia antenac. La medema azion fanatica á ence porté a la desdruzion dles gran figures de Budda tla val de Bamiyan che é vegnudes fates su tl 5. secul d. C. y che fova les statues de Budda en pé plu autes dl mond. Desdrutes é ence vegnudes d'autres statues de gran valour storich a Ghazni.
Do la fin dl regim di Talibans él endò ruvé na certa calma tla situazion politica afgana. Ai 9 d'otober él gnù tegnì les prumes lites presidenziales do da passa 30 agn. Sen él ence i abitanc dl Afganistan che se proa endò da mantegnì sie patrimone artistich secular. N team dla Svizra analiseia tant inant che ala va da restauré les statues gigantes de Budda; studiés franzeisc y talians, ma souraldut todesc laora per la recostruzion culturala dl paisc. La volonté é grana, ma i mesi a desposizion dret limités.

Les statues de legn dal Nuristan, na provinzia tl sud dl Afganistan (= "paisc dla lum", o dla "iluminazion", che ova denant inom Kafiristan "paisc de chi che ne crei nia") é vegnudes restauredes con gran maestria da Hans Rindler y é sen endò da vedei tl museum nazional de Kabul.

Co laora pa n restauradour?
Restauré valch é n laour che se ghira prezijion, acurateza y conescenza di materiai. Mete adum les 14 figures é sté n laour de pazienza scialdi sfadious, tant radicala é steda la forza de desdruzion di Talibans. I spedic dles statues à messù vegnì chiris fora toch per toch y dedò vegnì metus adum desche n puzzle. I toc puzenés é spo n iade vegnus metus adum provisoriamenter, per vedei sce ai passenova. Dedò ései vegnus encolés, endò toch per toch, y metus sot a prescion con smorzies y vetes enchin che la cola fova secia. statuta dl museum de KabulEmpermò sen podòvel vegnì enjonté l proscim toch. Pertes plu granes che manciova (y essa enscì lascé de gran loces) é vegnudes fates da nuef con la medema sort de legn; de maioures sfesses àn stopé con conesc de legn, les piceres endere con n kit spezial. L intervent de restaur n'é endere nia sté total, ence sce al vegniva ghiré enscì tl prum dai comitenc. Les fusties dla brutalité che s'à lascé fora sun chestes statues, dess resté da vedei, ales ti dà a les figures di antenac dl Nuristan na esprescion de dolour y de tragicité dut particolara.

Co ti dìjen pa a "ciauc" per persian modern?
Hans Rindler s'à ence tout soura de istruì, entratant sie laour de recostruzion, i restauradours y si aiutanc dl museum nazional de Kabul. Na enciaria nia tant scempla, sce an sà che tl Afganistan végnel rejoné Pashtu y Farsi (persian modern) che é doi lingac che persones de nosc raions rejona d'inrer. L ingleis fova l lingaz de na elite nia plu esistenta. L prum dì de laour à Hans Rindler abù a desposizion n tradutour, che rejonova n talian dret prezious (che recordova Dante y Manzoni) che al ova emparé te n curs al temp dla invajion sovietica. Les paroles tecniches dl'ert dla restaurazion mess endere dutes vegnì chirides te n vocabolar farsi-todesch, che ne les elencheia endere endie nia dutes. L plu saurì se capéscen a la fin con l aiut de dessegns. Do da 4 edemes de laour à Hans Rindler abù restauré 14 dles 18 statues de legn dl museum nazional de Kabul. L resultat é dret garaté, desche an pò vedei da les fotografies. La direzion dl museum é resteda tant contenta, che ala ti à damané a Rindler da sourantò ciamò d'autri laours de restaur.

Ma Hans Rindler, che s'à bele fat n bon inom con truepes esposizions (museum cultural Picasso/Malaga, galaria Sur/Viena, Istitut Cultural Ladin Micurà de Rü y e.i.) à messù desdì, ajache al fova bele impegné con d'autri projec.

Ai 5 de november deura a Bornech tla ciasa Ragen na esposizion coletiva con laours de Hans Rindler. En preparazion é n projet deberieda con Lois Anvidalfarei, Hans Kehrer y Silvester Promberger per l abeliment dla plaza de paisc d'Al Plan.

(test: Johanna Agreiter, Viena; traduzion PV)


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.381 seconc