Daurida dla mostra “Ciala…na storia”
scrit ai 07 October 2004 da les 08:15:08 da noeles |
|
L projet “Ciala…na storia” ence ta Fodom
Projet interladin per fé conesce les lijendes ladines ai mutons
 Ala é ruveda ence ta Fodom la mostra di laours di tosac de scola che à tout pert al projet “Ciala…na storia”, envieda via da l’Intendenza per la scola ladina dla Provinzia de Bulsan. Al se trata de n tentatif de arvejiné i tosac a conesce les liejendes ladines, y tl medem temp de stimolé la creativité y la capazité de les reelaboré ence te na forma grafica.
A la daurida en sabeda passeda tl salf dl ex Hotel Dolomiti à tout pert samben i tosac dla cuinta elementara da La Plie che à fat i laours, i genitours y i reprejentanc dla scola con dantfora la preside Antonella Fusaro, Olimpia Rasom dla Intendenza a Erica Castlunger y Eveline Vinatzer che ti é stedes do al projet, y les maestres Antonella De Toffol, Florina Detomaso y Manuala Gabrielli. L assessour comunal a la cultura, maestra Teresa Pezzei, à recordé l’emportanza de chisc projec che va soura i confins aministratifs (al projet à tout pert ence les scoles de Cianacei, Poza, Soraga, Urtijei, Selva, Runcadic, La Ila, San Ciascian, Al Plan y La Val). Paroles de lauda per l laour fat dai tosac él vegnù ence da chi che à mené inant i laour. Erica Castlunger à fat noté coche la storia fodoma, chela dla Aurona, sie steda la soula con n final positif. I tosac à ilustré sie laour, n maxi-liber ilustré con dessegns da n meter per 80 zentimetri, contan per fodom la storia. La mostra restarà daverta enfin ai 9 de otober, da les 10 a les 12. Mertesc y juebia ence da les 14 a les 17. (Lorenzo Soratroi)
|
