Ladin Standard: per me él valch de dret
Les valedes ladines se enconta economicamenter, ma se ciala encrousc politicamenter
Oramai se fej l cheder dles minonghes persoura la convocazion di ombolc plu cler: puech entusiasm, degugn ne sà da dì cie che an vuel perdret arjonje empera, gran prudenza tl rejoné, ence sce valch un essa vueia de mescedé su l argoment. Ma al é n tel chiet, n tel mister che degugn ne s'enfida da fé n vare n puech plu lonch di autri ombolc. Enchin a ciamò deguna convocazion, deguna comunicazion, no nioles, no luna, aria y basta. Te n tel clima él rie da podei speré che al garate valch de gran, o de straordinar, che al posse se traté de n aveniment che mude la storia di Ladins. L Superski Dolomiti ova mudé l'economia, ma nia la storia: i Ladins ne conta perchel net nia de plu. Les valedes s'enconta economicamenter, ma ales se ciala encrousc politicamenter. I ti on fat les domandes ence al ombolt de Badia, Ugo Dorigo, che conesc ben l mond tecnich y turistich dl Superski Dolomiti, al ova pu ence scrit truep sun chesta realté.
Per Dorigo é l'intenzion de mete su n consei di ombolc ladins n fat propi "polito", na cossa zenz'auter dreta. Cie che al sautarà fora de concret, chest vedaràn empermò entratant la senteda, ajache enchin a ciamò ne n'él degun program y al n'à giaté deguna comunicazion. Al s'aoda n dialogh, na bona discuscion con resultac concrec.
