N numer nuef de "LADINS" do les lites
Entourn 4000 litadours ladins ne se sent nia raprejentés da la Svp - Al spizola la vueia de jí inant con l laour de partì
Chisc dis él vegnù fora de stampa l prum numer dl boletin de partì dla lista "LADINS" do les lites dl 2003 che à comporté bendebot de desfata litala, n manco de 2000 oujes che ti à costé per 350 oujes n scagn tl Consei Provinzial dla provinzia de Bulsan. An aratova bele che duc essa sciuré les ermes, ma Carlo Willeit y n clap de sostegnidours é empò dla minonga che ala ne dess nia jì tant lizia. Nia na picera cumpeida de litadours ladins tla Val Badia y te Gherdeina ne se sent nia raprejentés da la Svp. An vuel se reorganisé, dantaldut introdujan n sistem de iscrizions plu strent y cialan inant. Defata vegniràl tegnì na assemblea generala.
Bele da d'aisciuda s’ova abiné la direzion plu lergia dl moviment politich LADINS per ejaminé concretamenter les formes de renovament. Cler él vegnù sotrissé l'emportanza de na organisazion assoziativa che se lascia demé arjonje con iscrizions y adejions al moviment. Sen, che al é vegnù mancia la raprejentanza politica tla Provinzia coche basa de organisazion y de finanziament, mess l moviment se mantegnì enstes con sies forzes; al va perchel debujegn da se organisé desche vigni autra lia, con sozes, cuotes soziales y organs lités. Al é vegnù fat fora da prevedei does categories: i iscric y i sostegnidours dl moviment. Al é bele vegnù aproé la cherta de iscrizion, la cuota soziala de 10 euro al ann y mudé l statut aladò dla strutura nueva.
