"I me dejidreie che l publich vegne informé dantfora"
I ombolc mess fé clareza dantaldut sun la chestion dl lingaz scrit unifiché y sun les poscibeltés concretes de coliament
La proposta de mete a jì na discuscion publica y ledia soura les enciaries y i fins dl consei di ombolc ladins é do mia minonga na basa utla per n confront publich de idees politiches. Sce les rueses florirà depénel dantaldut da la forza dles raijes y da sia volonté de porté fruc. Ivan Lezuo.
Ajache ie rate che al é bele vegnù fat n projet concret dles poscibles competenzes y dles finalités dl consei, me dejidreii che i promotours informeie lassoura l publich bele dantfora y favoresce enscì na partezipazion direta dla popolazion. Te chesta moda podessa la jent avei idees plu cleres soura l conzet che sta dovia a chesta istituzion y la discuscion podarà ester ledia y plu daverta.
I ne spere nia che l consei ae anter si fins prinzipai chel de chieté ju chi che sostegn la unificazion ladina y de sanzioné tl medem moment l status quo politich-aministratif zenza chirì enultima na colbaorazion reala y efizienta.
En linia de prinzip rati che i ombolc ladins mess fè clareza dantaldut soura la chestion dl ladin unifiché, dla unificazion di ladins, dles poscibeltés concretes de coliament y di mass media ladins.
Dessegur é vigni colaborazion anter i ladins, samben ence chela di ombolc, da sostegnì y da sburlé inant, a condizion che al stae dovia na volonté senziera de potenzié i liams anter i ladins y che al ne vegne nia categoricamenter sclut usc che tl davegnì sarà rie da podei endò daurì.
Ivan Lezuo
