benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Prejentazion dl CD “Tera DoloMitica”
scrit ai 31 August 2004 da les 14:26:32 da noeles

Cultura

 

Cianteme i sons de tia tera!

Chisc dis végnel fora l CD “Tera DoloMitica” con dejenuef grups y ciantautours con cianties originales ladines da cater valedes entourn l Sela. Grana la sodesfazion di produtours

Georg Mussner y Iaco RigoTe na spana de temp de n ann à dejenuef grups musicai da la Ladinia tout su tl studio de registrazions Davide-Records a Badia y SISI-Records a Urtijei la seconda plata coletiva de mujiga moderna ladina. L projet é garaté sun iniziativa dla Union Ciantautours Ladins (UCL) sot a la presidenza de Romano Obwegs y la coordinazion de Iaco Rigo.

Foto: Georg Mussner y Iaco Rigo, da audì sun l CD sciche duo. Georg Mussner à dant da diesc agn coordiné la pruma plata de mujiga moderna ladina “The Best of Ladiniatour”, Iaco Rigo sen la seconda.



Chi ne se recorda pa nia l CD de mujiga moderna ladina gnuda fora dant feter diesc agn en ocajion dla cuarta edizion dla Ladiniatour? L titul fova “The best of Ladiniatour” y tolova ite cianties originales ladines de na deseina de grups da trei vals entourn l Sela y di Grijons L merit dla Ladiniatour, pieda via dl 1989, é sté dl musizist y componist Georg Mussner, colaboradour chi temps dla Union Generala di Ladins dles Dolomites.
La plata nueva che vegn fora chisc dis porta l titul “Tera DoloMitica”, paroles che dess ester bones de descrive na sort de mujiga particolara moderna che s’à ponù ite y svilupé ti ultims vintecinch agn tles vals ladines. “Al dess ester na imprescion y esprescion dla vita tles montes y de n teritore che rejona n sie lingaz y à sapù da ascuté su tamben si temps passés anter storia, usanzes y sajons che les novités de n mond che cresc tres plu adum” , enscì la spligazion revardenta dl coordinadour dl projet Iaco Rigo.

I ciantautours y grups che sona mujiga moderna ladina à fat n gran vare inant tla cualité da compone, enjigné y soné les nuances che carateriseia la mujiga plu soneda atualmenter a livel internazional. L merit é chilò di talenc che vegn docà y dla formazion scolastich-profescionala. Miours y plu artistics é deventés i tesc' che toma demé plu singolarmenter te n kitsch y romantizism.

Jean Daniel Granruaz da La IlaDa audì él sun chesta plata dlongia ai grups nuefs che s’à formé dantaldut y propi per l’ocajion, i grups bele conescius al publich ladin desche “Le Zapole”, “I Acajo”, “The Peufla”, “Emmaus” y i ciantautours prejenc da la pruma Ladiniatour dl 1989 encà: Alexander Dal Plan, Hubert Frontull y Iaco Rigo. Laprò él spo i Chrisalide con Alessandro Trebo y Christian Pescosta, Jean Daniel Granruaz (foto), Phil Mer (Philipp Mersa), Leo Irsara, Max Castlunger y l duo “Zenzo y Ciapo” (Zenzo Obwegs bele conesciù tl scenar dla mujiga ladina per i Frak y i Mosaik  y Klaus Erlacher dal Ciapolere).
I grups nuefs porta i inoms de Innuendo, Savage Seas, Sweet Willow, Lovelace (duc cater dl’Alta Val Badia) y “dux melo sux” de Fascia.

Sun la plata ne màncel nia n toch o l auter plu heavy, ence l trash-metal y l punk é da audì. Ejempl: l grup de Fascia “dux melo sux” à tout ca n test de na ciantia popolara fasciana per fé fora dla melodia na parodia ironica y anticonformista. La ironia, de carater popolar, é ence da giaté tla ciantia de “Zenzo y Ciapo” dal titul “La val co cunta”.
Tesc' con ones de critica soziala é ence laprò, al é la ousc de jent joena che ne vuel nia cialé pro demé enscì bel y cie che al suzed fora per l mond y ence te nosc paisc da mont (p. ej. “Sentenzes” dla band “Lovelace”). Deplù tesc' rejona spo da “ascuté su”, da se dé ju con l’interiorité y con l chiet, per arjonje n ecuiliber individual y sozial. Ence de rezetes per arjonje la contenteza végnel cianté, te n liam con la natura y les sajons da mont.

Tant de mistich él pa sun l CD? N bel contribut porta l grup “Le Zapole” con “La Lum d’Aurona”, che cianta dl re varizious y engorde che ne giata deguna pesc tla vita y nience dedò. La ciantia dl grup fodom sta per la mitologia y la fantasia de nost popul de mont. Mistich, ma ence dret metaforich per na apocalissa personala, é l toch de Leo Irsara da San Ciascian dal titul “I zingaindri dl cîl”.

I grups y ciantautours
Dejenuef da cater valedes ladines. I reporton i interprec y l titul dles cianties:
Phil Mer - Monn nü, The Pëufla - Fesa, Alexander Dal Plan - La serenité, Chrisalide - Le blues é por te, Zenzo y Ciapo - La Val co cunta, Innuendo - Sonns, Le Zapole - La Lum d’Aurona, Sweet Willow - Urun la liberté, Acajo - Cuntentëza, Emmaus - Melodia dai fredesc dal monn, Savage Seas - Spidl striné, Hubert Frontull - Gran momonc, Jean Daniel Granruaz - Löm, Christian Pescosta - Tëmp y pinsier, Iaco Rigo - Cancun, Leo Irsara - Zingaindri dl cîl, Dux melo sux - La cianzon de Val de Fascia, Lovelace - Sentënzes, Max Castlunger - Fajun la pêsc.

L cuertl dl CD
Jean Daniel Granruaz da La IlaL cuertl dl CD vegn abelí da pitures dla joena artista Gabi Mutschlechner d’Al Plan, daite i tesc' originai con resumés dl contegnù  per todesch y talian

L sfuei tla vaina dl CD contegn i tesć dles cianties desche ales é da audì da la registrazion, con n retrat de vigni grup y di ciantautours y l’indicazion de dac informatifs sun l grup. Laprò él ence les miscions, i numeri telefonics de contat y les adresses eletroniches che po i oghé al ascutadour y apascioné dl grup. L sfuei tol ite deplù pitures dl’artista Gabi Mutschlechner d’Al Plan che s’à dé ju con l tema dl CD “Tera DoloMitica”. Al zenter de si depenc sta la persona, a valch maniera idealiseda y ence enauzeda a figura mitologica. La composizion grafica é vegnuda fata dal stude de grafica y agentura de reclam “Pentagon” de Santa Crestina/Gherdeina.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 4
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.402 seconc