Consei de formazion Selva: program da d’auton
scrit ai 30 August 2004 da les 15:23:40 da noeles |
|
Cresce y madurí tres ativités sportives
L projet "Educazion tres l sport 2004" va inant con na lingia de scomenciadives: turnoi dl palé, seira de dias con Karl Unterkircher sun l K2 tl Himalaya, "A n vare dal ciel", film sun l jí a crep dles eles y d'auter
 Entant chest ultim invern ova les lies de Selva laoré fora deberieda con d’autres lies a livel de valeda l projet "Educazion tres l sport 2004" metan adum na bela cumpeida de scomenciadives. Da d’aisciuda fòvel vegnú envié via con suzes la pruma pert dles manifestazions. Entant i meisc de setember, de otober y de november va l projet inant con n valgunes scomenciadives nueves: Karl Unterkirchner (foto: sun la piza dl K2) prejentará dias dla espedizion tl Himalaya chest ann, les eles rejonará entourn na meisa torona sun l jí a crep y al vegnirá adalerch Toni Innauer, conesciú sautadour de schi da Dispruch ti agn '80, per rejoné sun l sport y coche an pò cresce y madurí empera.
Ai 18 de setember vegnirál tegnú n turnoi de juech al palé te Val. Scomencé végnel da les 9 dadoman. Chest turnoi vegn metù a jì da l'assoziazion nazionala di Carabiniers. 6 scuadres se à bele scrit ite. Do l turnoi saràl per duc canc, jugadours y spetadours, na griliada.
Seira de dias tla Cesa de cultura de Selva con Karl Unterkircher sun sia spedizion tl Himalaya de chest ann y plu avisa sun de mei sun l Everest y de messel sun l K2. Chesta seira vegn metuda a jì dal Grup di Joegn de Selva. La data vegnirá lasceda alsavei plu inant.
En mertesc ai 28 de setember prejenta Ingrid Runggaldier tla Scolina Salieta a Urtijei sie film sun l jí a crep dles eles. "A n vare dal ciel" se clama l film che trata dles pionieres feminiles dl jí a crep. Do l film saràl na meisa torona olache al vegnirà engiamié fora esperienzes y minonghes con a la pert Manuala Mayr de Falzes, Ulla Walder de Persenon, Luisa Jovane dl Ciareza y Nadia Di Mai de Ampez. La seira vegn metuda a jì da la Meisa Torona y scomencia da les 20.30.
La Scola Mesana de Selva met a jì n projet te scola sun l medem tema con si scolés acompagnés dai maestri/da les maestres.
En mertesc ai 12 de otober vàla inant con n convegn sun la medejina sportiva tla sala de comun de S. Cristina. Al vegn adalerch i dotours Regele dla repartizion de medejina sportiva, l dotour Meri psicologh tl ciamp dl sport y atlec de livel mondial. Tres la seira meina l dotour Patrick Franzoni. Ence chesta seira vegn metuda a jì da l'assoziazion nazionala di Carabiniers y scomencia da les 20.30.
De enjonta á "La Meisa Torona" programé n valgugn cursc:
N curs de ginastica alternativa "Feldenkrais" che scomencia ai 23 de setember;
n curs de ginastica tl’ega che scomencia ai 5 de otober y n curs per se defene te situazions pericolouses, che scomencia ai 6 de otober. Chest ultim é n curs tamben che veid dantfora sibe teoria che pratica.
L projet vegn sclut ju con Toni Innauer y na conferenza ai 17 de november. Chest gran sportif austriach rejonarà sun coche an pò madurí y cresce tres l sport. Organisadour dla seira é l Schiclub Gherdeina che envieia tla picera sala de comun a S. Cristina, da les 20.30.
L projet "Educazion tres l sport 2004" vegn sclut ju con na mostra de fotografies. Sibe les manifestazions da d’aisciuda che les manifestazions che vegn metudes a jí chest auton vegn fotografedes dal Fotoclub Gherdeina che les mostrarà tl salf Bera Albino tla Cesa de cultura de Selva. La daurida é veduda dantfora per en vender, ai 12 de november, da les 20.30.
| 
