benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Persones: Sergio Masarei
scrit ai 30 August 2004 da les 12:09:45 da noeles

Persones

 

La medaia de merit al maester Sergio Masarei

La comunité ladina ti é debit truep per sies bries a ben de lingaz y cultura ladina ta Fodom

Dal 1964 encà premieia Tirol persones che s’à fat merit per sia jent sun i ciamps plu desvalifs desche la scola, la cultura, l cianté, l soné, la pauraria, l artejanat, l turism, l trafich, i studafuesc, i handicapés, jent vedla y soula, la gliejia, l ambient, l alpinism, l’ert, la leteratura, la storia, les usanzes y tradizions, i scizeri, la formazion y istruzion di cherscius y e. i.. Vigni ann en Santa Maria dal Ciof ti sourandà Dispruch a cotant de persones de dut Tirol la medaia al merit y anter chestes él ence vigni ann valch ladin. En l ann passé à Dispruch per l prum iade premié n ladin fora dles seides da sen de Südtirol, l ex-ombolt de Fodom Bruno Trebo che à sies raijes a Al Plan tla familia de Trebo. Eniann i àla toché al maester Sergio Masarei da pié do la medaia y perchel volonse audì, cie che al à fat per la comunité de sia jent ladina.



Na delegazion dal comun da Fodom con a cef l ombolt prof. Gianni Pezzei y l’assessoura a la cultura Teresa Pezzei é juda empera con l maester Sergio fora Kufstein. Les onoranzes é chesta outa gnudes partides fora a Kufstein da pert di doi sourastanc de Tirol van Staa y Durnwalder, ajache chesta zité festejeia eniann i 500 agn che ala fej pert de Tirol. Che persones de comun é judes empera fora Kufstein desmostra la gran stima da pert dl comun Fodom per les ativités culturales dl maester Sergio Masarei.  

Sergio MasareiNa vita per la scola
Sergio é nasciù a Cherz ta Fodom ai 8 de jugn dl 1943; si genitours é Palma Pellegrini de Tone Chech da Renac y Bepo ( Tavan), fis de paurs. L pere Bepo ova dret na bona man y al é sté bon da se fé su da soul na ciasa tla vila de Cherz. Ai é cinch mutons te familia, Sergio é l secont. A scola é Sergio ju a San Jan y spo àl fat la mesana a Bornech y chela da maestri tl Istitut Magistral G.Pascoli a Bulsan. Per si genitours fova l lascé studié n mut cotant de peis finanziar, ma con gran entura y con n pice stipendium da pert di Ladins ti l’à Sergio fata. Con 20 agn ova Sergio l diplom da maester tla man y al à podù mete man da se dé ju con i plu pici che i stova dret a cuer. Empruma àl ensegné a Roncat, spo àl sourantout zacotant de suplenzes ju per Egort, dedò àl messù jì a defene la patria. Ruvé chel servisc à l maester Sergio endò ensegné a Roncat, doi agn a Ornela, ot agn a La Court, n ann a San Jan y dal 1976 al 1998 a La Pli da Fodom. Sergio à tres abù a cuer l idiom fodom de sia jent che al vedova deslis. Te scola àl tres ence adoré l ladin, metù adum rimes ladines per festes da San Micurà, per Nadel, per Pasca, per saré ite l’ann de scola, per canche al capitova l vescul, per la 1.Comunion, per nozes y giubilés . Al à metù adum sfueis de scola” Quinta flash..”, deplù edizions dl  “ Calender Fodom da scola”. Deberieda con l Istitut Ladin de Fascia él gnù fora – “L louf e i trei porcelins – Cianbolfin”. Sergio à tres ensegné la storia dla valeda. Sce la identité ladina s’à ta Fodom mantegnì valgamia él ence truep merit dal maester Sergio.

 Ativités fora de scola
Sciche trueps ensegnanc apascionés de sie lingaz dla oma, de sie mond cultural ladin, à ence l maester Sergio dediché truep temp a ativités culturales de gran porteda per na mendranza asmaceda ite anter does de gran cultures che n’essa nia puech apetit per mangé su la picera mendranza. L maester Sergio à ensegné trei agn domesdì ladin tla scola mesana y deberieda con Ernesto Renon àl metù adum per trei agn l foliet dla ploania «  Le nuove del Paisc - Le vijinanze da Fodom » una al iade con truepes intervistes. Al à gonot daidé fora con truepes informazions y laours studiés talians y jent da foradecà, i Istituc Ladins, l Museum Ladin de Tor, al à aconsié studenc d’université interessés al ladin da Fodom, al à lascé audì truepes trasmiscions tal Radio ladin y tla Televijion ladina. Per la Union di Ladins da Fodom y la Union Generala à Sergio Masarei spenù cotant de temp. Canche Bruno Trebo fova sourastant se cruziova deberieda Sergio Masarei per l’ativité dla lia culturala, per dé fora l foliet dla Union di ladins “ El feral”; al jiva a  Aunejia a mené do da enjigné na lege de sconanza per i ladins da Souramont, trueps agn él sté member dla Federazion di Ladins dl Venet. Sergio fajova pert dla comiscion dla Generela per unifiché la grafia ladina, al é sté member dla Comiscion dl Istitut de Fascia.  Al à dé sie contribut pro l projet Spell per elaboré n lingaz ladin scrit unifiché. Ben 30 agn é l maester Sergio sté a cef dla sezion da Fodom dla ABVS ( chi che ofresc sanch).

Ativité leterara
Sergio à la pena saurida, al à tost metù ju na rima o valch articul. Chest se damana talent, gran savei, competenza y gran interes per la materia ladina. Sergio à dé fora chisc libri: Chicherichi – L plu bel son mi – Madalena – El nanin – Rime sauride – Doi ore n santa pêsc – Tosat da nnier – Catarina Lanz – Gliejia decanala de San Iaco – 20 Anni di generosità ( chi dal sanch); al à conscidré ju la 2. edizion dal vocabolar fodom de A.Pellegrini; Sergio à traponú tl ladin “ Mia perjonia en Ruscia “ de Iaco Fever, metù tl ladin l diare de Tato de Luca y l ms. dal  Favai. L maester Sergio à daidé l foliet ladin dal 1972 al 1979 y da dailò inant àl secodì la plata fodoma de «La Usc di Ladins» enfin al 2002, n laour de gran bria, temp y pazienza. L maester Sergio à dé sie contribut per les publicazions: Na sera fodoma – Fodom che cianta – Na chitara fodoma – Dolasilla (de M.L.Maurer) – Imprescions ( de F.Brunel) - Antologia lirica ladina ( de W.Balardi). Al à coordiné l liber “Uciei da Fodom” de R.Gabrielli, al à daidé mete adum la “ Ajenda Ladina” dla Union Generela, l liber  “Quiz dles valedes ladines", al à laoré sun la toponomastica fodoma per l Istitut Ladin da San Martin che la firma de chertes geografiches “Tabacco” à spo podù adoré. L maester Sergio à mostré n gran amour devers de sia tera fodoma a chela che al ti à dediché la gran pert de sie temp lede. La comunité ladina da Fodom ti é debit truep al maester Sergio. Al à daidé a tegnì su l fodom, a renforzé la identité ladina, a i fé capì che la salveza di ladins é tl tegní adum duc canc deberieda, dutes les cinch valedes ladines entourn l Sala. Sergio Masarei viv i agn de sia pension a La Plie da Fodom pro sia familia, con sia femena Linda da Ornela y con si mutons Martina y Elvio. Gran sodesfazion à l neine Sergio con la picia  neza Vanessa.

N maester  de gran ejempl
La lista dla ativité culturala dal maester Sergio é longia y dessegur n’àl perchel trascoré nience en sich la scola, i stova pu rodunt la istruzion di mutons tant a cuer. Dal ejempl dl maester da Cherz pòn vedei che n ensegnant pò dlongia la scola ester dret atif per l ben dla comunité ladina. Cis encuei che i vivon te n mond trafughé dai afars, dai scioldi, dal egoism vàl bujegn da apriejé, da avei de tel persones idealistes y emplides dal gran amour a sia cultura, a sie popul che mess gni stravardé da la tomeda te n mond materialist. N popul che ti lascia la souraman al materialism y egoism dà tost su sia identité,  lingaz y la cultura perd sostanza, al vegn assorbì da paroles forestes y enscì sparesc l popul enstes. Sce un vuel y é competent, spo ciàfiel de laoré sun l ciamp cultural enfin che al vuel; deplù istituzions y persones privates chier de tel jent studieda. Al é demé da speré che al nen vegne docà cotantes, essa pu i ladins da laoré sun n grum de ciamps culturai per raforzé la cultura. 
 
Lois Trebo


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Cultura

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.406 seconc