benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

50 agn Cesa di Ladins: restruturazion
scrit ai 28 August 2004 da les 22:55:42 da noeles

Cultura

 

Lum verda per l derturament, la provinzia empermet 1 n milion de euro 

Pensiers dl President dla Union Generela, Nani Pellegrini: "La Cesa á daidé superé la despartizion ladina" y dl President dla Comunanza Ladina Ivan Lezuo: "Les paroles de Florian Mussner se ghira n aprofondiment"

En prejenza de truepes autorités él vegnú daurí enseira les festivités a recordanza di "50 agn Cesa di Ladins". Te chesta ocajion á l assessour Florian Mussner lascé alsavei che anter region Trentino-Südtirol y provinzia de Bulsan déssel vegní metú a desposizion 1 n milion de euro per la derturazion y chel zenza che la Union di Ladins de Gherdeina (UGL), patrona dl fabricat, messe zede derc de proprieté. "Na bela scinconda che nes dará ciamò plu ardiment de laoré per la gauja ladina" á dit l president dla ULG, Egon Vinatzer. L preventif per la derturazion dla Cesa se la roda entourn a 3 milions de euro. L rest dess vegní trat su anter comuns, fondazions y eventualmenter n contribut dal Govern de Roma y da l'Union Europeica. Te chest contest él ence da recordé che Carlo Willeit ova dl 2003 tegní su l bilanz provinzial per che al vegnissa metú ite n capitul de finanziament dl derturament dla Cesa di Ladins.



de Ivan Lezuo, president dla Comunanza Ladina de Bulsan

La festa de daurida di 50 agn dla ciasa di Ladins a Urtijei ai 27 de agost é sté n aveniment dret emportant per la cultura ladina. Al é vegnú desmostré che con idealism y entusiasm él meso de arjonje truep. Al me à sapù dassen bel dantaldut l film en onour de anda Frida Piazza. Ala é per duc i ladins y cis per nos joegn n ejempl da imité. Ala nes mostra su che an mess tegnì pro ence sce l troi é ert y grief:  a la fin rúven al travert. I volesse ti dì dilan de cuer a duc chi che à laoré adum per l ben dla ladinité daite dla Cesa di Ladins y samben a anda Frida per sie empegn straordinar. Ad multos annos.

Les paroles soura la unité ladina dl assessour Florian Mussner tla ocajion dla festa di 50 agn dla ciasa di Ladins a Urtijei ghira n aprofondiment y na reflescion che vae ite plu avisa tla chestion. L assessour dij che an ne pò nia tres cialé endò de 50 o 100 agn (i agn dl tratat de Paris, dl statut de autonomia y dla fondazion dla Union Generela) ma an mess lascé da pert l ciampanilism y jì inant te n spirit europeich. A pert la retorica usuala pòn capì che ciamò n iade végnel adoré does mesures desferentes. Tles revendicazions dla SVP per ciapé tres de plu derc à abù la dimenjion storica y culturala dagnora na emportanza fondamentala. Al ne é nia debujegn de jì massa zeruch tl temp. Tla Dolomiten di 28/29 de agost dl 2004 sun plata 13 dij Durnwalder, ciamò n iade scialdi cruzié che Roma podessa tò demez ai sudtiroleisc si privilegs:" Schließlich sei das Autonomiestatut im Falle Südtirols Ausdruck einer geschichtlichen, kulturellen und sprachlichen Sonderstellung, die es zu bewahren gelte." Souraprò él ince duta la chestion dla toponomastica, él l monument dla vitoria a Bulsan, la Euregio Tirol, i scizeri, olà che trueps de chi dla SVP fej pert y che à sciche fin la unité dl Tirol, per ne desmentié nia la esclujion di talians dal tesserament tla SVP.  An pò vedei che al ne mancia mai n referiment plu o manco formal a la storia, pian via dal vedl Tirol enfin a ruvé al rie temp dl fascism. Al vegn tres recordé che l'Austria é la „Schutzmacht" de Südtirol olà che al viv na mendranza austriaca. An podessa se damané, per coerenza, sce al é daveira debujegn te n contest europeich de na tel protezion „vedla" de 50 agn.

L ciampanilism, la rivalité de ciampanil - chest vuel dì esclujion y nia archirida de na unité, desferenziazion anter ladins todesc y ladins talians y nia na veduda unitara, defenura gelousa de si privilegs che  an veid propi tla politica ladina tl Südtirol: l ladin standard vegn boicoté, a l'adoranza dl ladin da Souramont ne ti végnel  dé deguna lerch no ti concursc no pro l ejam de trilinguism. Con na vijion europeica y con ence demé n fruz de bona volonté éssen messù bele da giut tò demez chestes desferenzies, ence chilò te Südtirol.

Chirì la unité ladina vuel dì unì les forzes per crié deberieda na fondamenta y n coordinament tl ciamp nia demé dla cultura y dl folclor, ma cis tla politica, tla aministrazion, tla scola y tla economia che vel per duc i ladins. Sce l mudament di confins deida truep a derzé fora chisc fins, ne podonse nia l scluje fora a priori.

 

Paroles de Nani Pellegrini, President dla Union Generela, 50 agn de Cesa di Ladins- Urtijei, 27 agost,2004

Canche an complesc i agn, dantaldut sce ai é cincanta, ciálen inaò y inant. Dal 1954, da canche ala é vegnuda fondeda, la Cesa di Ladins per cerc versc ne s'á mudé nia, per d'autri versc cotant. La despartizion dla Ladinia sun teritores con situazions politiches y aministratives desvalives é resteda, con les conseguenzes che i savon: de gran descuilibers de svilup sozio-economich y de cultura anter les vals.
Ma valch, per fortuna s'á mudé en miec y al é la comunicazion anter les vals, souradut per merit dl edemanal La USC, ma manco respet a les comunicazions tres radio y televijion. I messon osservé, per ejempl, che TRAIL, che vuel ester na trasmiscion ladina transprovinziala, ti lascia puech o deguna lerch a la Ladinia che ne fej nia pert dla Region Autonoma Trentin -Sudtirol. Ma te chest contest de despartizion podonse dì che al fej ezezion l aspet cultural che coi Istituc Culturai Micurà de Rü, Majon di Fascegn y encuei ence la Cesa de Jan da Col á deslargé fora l’ativité culturala soura i confins regionai y provinziai. Y chilò messonse reconesce l’ativité, vedla de cincanta agn dla Cesa di Ladins de Gherdeina, che à dagnora abú l uedl davert sun la Ladinia entiera. En particolar per l’Union Generela di Ladins dles Dolomites, che é bele da cincanta agn encà la soula assoziazion culturala transprovinziala y transregionala, aldidancuei preveduda y reconesciuda da la Lege Nazionala, la Lege 482/99 sun la "sconanza dles mendranzes".
La Cesa di Ladins de Urtijei é steda dagnora daverta per encontedes de jornalisc', de studiousc y de esperc dla Ladinia, n luech de confront de idees, de discuscion y de gestion dla gauja dla mendranza Ladina enstessa. Nos nes auguron che ala reste enscí, o miec, che ala cresce y che ala ciape dutes les consciderazions y i finanziamenc da pert dles istutuzions che ala se merita.
Da pert dla Generela enveze ti vael a la Cesa i augures plu senziers per n bel y segur davegnì y i rengraziamenc per l suport inteletual y material che, con gran generosité y competenza, ti àla dagnora dé.
Nani Pellegrini
President dl’Union Generela di Ladins dla Dolomites.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: 50 agn Cesa di Ladins: restruturazion (ponc: 1)
da Dolasila ai 29 August 2004 da les 11:14:22
(Infos sun l utilisadour | Ti mané n messaje privat)
ci varizia. Regiun y provinzia mess se meter adum por n miliun! Implanc de portamunt ciafa ben 5 miliuns de euro dla provinzia...


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.442 seconc