Bula, Runcadic y Sureghes dess ruvé pro Urtijei
La Svp á dit no enseira a na mozion di Ladins y vuel che la iniziativa peie via empruma da la jent de chestes frazions
Na mozion dla frazion di LADINS, prejenteda enseira en gaujion dla senteda de comun a Urtijei, essa endò n iade podú porté ite moviment te na chestion che vegn tresfora a lum, plu o manco sterch vigni 10-15 agn: les frazions ladines de Sureghes, Runcadic y Bula tl comun todesch de Ciastel dess ruvé pro l comun de Urtijei de chel che ales fej pert sozialmenter y culturalmenter. Ma l tentatif é vegnú refudé da la maioranza Svp tl comun de Urtijei che á dit "no" a la mozion dla frazion Ladins de mete en pé na comiscion de enrescida che studie les poscibeltés y la volenté dla jent.
La comiscion fossa vegnuda componuda da 2 aconsiadours de vigni partí y da raprejentanc de chestes frazions. La frazion de Luech y Natura te comun á sostegní la proposta, depierpul che la Svp se á trat sotfora, dijan che an dess aspeté che la iniziativa peie via da la jent de chestes frazions. La frazion dí Ladins ne vuel nia lascé tomé la chestion, ma la prejenté ciamò n iade, enscí sie portaousc Heinrich Demetz.
