L davegnì de n lingaz depen dal gré de adoranza ti mass-media

Chisc dis él ju en ona la pruma stazion radio-tv te internet tl lingaz basch - Ence i rumanc tla Svizra sun l medem troi - Les trasmiscions tres internet á l gran vantaje che i spetadours y i ascutadours ne é nia plu liés a n orar, ma ei pò les ascuté canche ei á plu dlaorela - Net nia pro la RAI ciamò - L assessour Mussner y la Consulta Ladina taia depierpul contribuc a sostegn di mass-media a dann di Ladins

Sun scomenciadiva dl "Grupo Proyeccion" de Bilbao él ju on-line chisc dis la pruma stazion radio-tv basca sun internet. Duc i programs vegn trasmetus tl lingaz basch, clamé euskara, con l fin de l promueve amplamenter te internet. N sit scempl, saurì da navighé y informatif. Al é cler che l davegnì de n lingaz depen - dlongia n bon ensegnament te scola - dal gré de adoranza ti mass-media, enscí i promotours. La televijion y l radio rumanc tla Svizra fej da n pez l medem, feter dutes les trasmiscions radiofoniches pò vegnì ascutedes su ence tres internet da vigni ora, zenza ester liés a n orar.  Da vedei él tamben l teletext. Plu che al n'é da garat, plu d'utl él. En gran contrast sta la politica dla SVP te Südtirol devers i Ladins dles Dolomites.  L assessour provinzial a la cultura ladina y a les mendranzes Florian Mussner adum a la Consulta à chest ann enfinamai taié de cotant i contribuc a chestes iniziatives desche an pò lieje tla ultima USC di Ladins te na intervista al president dla Jonta, Luis Durnwalder, che dij depierpul sun na domanda: i ne sé net nia. Cie strategia stal pa viadedò? se damana la redazion. L melcontent cresc do l mote. A mandreta: l emblem dl radio y dla televijion rumancia.

La tv-radio internet á l vantaje che les trasmiscions, dantfora les noeles, pò vegní cialedes y ascutedes su independentamenter dal orar de trasmiscion aladò che an á plu dlaorela. L setour noeles tres internet se deslergiará perchel tl davegní tres deplù. Net nia de chest vers n'á ciamò fat la RAI taliana a livel regional per cie che reverda les trasmiscion todesces y ladines, ma per cie che reverda cheles talianes ben y plu avisa a la miscion http://www.inforegioni.rai.it/trentino.htm oláche an pò vedei y ascuté su duc i telejornai regionai talians.

L sit dla televijion basca pò vegní cherdé su a la miscion:  www.euskaraz.tv

L sit dl radio y dla tv rumancia pò vegnì cherdé su a la miscion: www.rtr.ch