Durnwalder fova litabel
L recurs prejenté da n valgugn zitadins é vegnú traté encuei - L Procuratour Tarfusser volova mané inant l recurs a la Court Costituzionala
Encuei juebia, ai 19 de aost, á l colege de 3 vicars presiedú da Edoardo Mori dezidú sun l recurs prejenté da en valgugn zitadins - anter chisc ence 2 gherdeines y con l sostegn politich dl partí di Verc - sun la litabelté o manco dl President dla Jonta provinziala dr. Luis Durnwalder en gaujion dles ultimes lites provinziales de november dl 2003. Al fova tl medem temp component dl Consei dla sozieté Sadobre de chela che la provinzia é patrona a maioranza. L colege á desbuté l recurs y deponará anter 10 dis la sentenza con la motivazion revardenta.
Les pizes dla Svp dijova de ne se sté nia ert y aratova che l recurs vegniva desbuté, ence ajache Durnwalder s'ova retrat da chesta enciaria de mei dl 2004 y empermò al scomenciament de jugn dl 2004 é l resultat dles lites vegnú convalidé dal Consei Provinzial. Apeina da chest moment - enscí la defeisa - podòvel nasce n conflit d'interes che essa podú ester na gauja de nia-litabelté. Per segurté án empò mané inant al Consei Regional n model de letura autentica dla passaja dla lege litala che reverda les gaujes de nia-litabelté. La pert recorenta pesova depierpul dantaldut sun la nia-litabelté originara, da empruma encá ne podova n component dla Sadobre nia candidé. Al messova se demete da chesta enciaria dant les lites. Marevueia án abú che l colege á lit ciamò entratant la audienza l dispositif de sentenza. L Procuradour dl Tribunal Cuno Tarfusser ova damané che l recurs vegne mané inant a la Court Costituzionala per na clarificazion. La pert recorenta aspeta sen la motivazion per vedei, sce al é l caje de se ouje a la proscima istanza giudiziala.
