Tles autres Dolomites misteriouses
Sun les pedies di dinosaurs tl Parch dles Dolomites Furlanes con sies pizes enciournentes y nia-conesciudes
Per chi che volessa jí n iade enzaul d'auter su per mont, sen che les Dolomites zentrales é souraplenes de turisc', pòl zenzauter ti vegní aconsié l parch Natural dles Dolomites Furlanes che se desten tla pert ozidentala dl Friul anter i flums dl Taiament y dl Plaf, nia tant dalonc da nos, n raion dutaorela scialdi salvar y con truepes belezes naturales.
Il Puarton dai Monfalcons.
Dret aut é l gré de salvarité de dut l raion dles Dolomites Furlanes, davia che demé pueces stredes meina tles montes aldefora di paisc abités. Al se trata de n raion caraterisé da truepes valedes strentes y longes. L parch se deslergia sun na souraspersa de 36.950 etars y tol ite i teritores dla Val Celina con i paisc de Andreis, de Cimolais, de Claut, de Ert y de Cas dl Vajont, la Auta Val dl Taiament (Fôr Disore/Forni di Sopra y Fôr Disot/Forni di Sotto) tla Cergnia y la Val Tramontina (Frisanch/Frisanco y Enemonc di Sore). De bendebot de interes naturalistich é les fusties de dinosaurs che an á giaté dl 1994 tl comun de Claut sun n peron de dolomia prinzipala dlongia l ruf de Ciol de Ciasavent. Tl teritore végnel rejoné furlan te varietés dret particolares. L troi plu curt da les Dolomites é chel de passé per Ampez-Ciadoura per ruvé al Pas Mauria, atira viadedò l jouf él l paisc de Fôr Disore/Forni di Sopra con na veduda sun i creps fac ju sun la foto.
N troi che conduj tl cuer dl Parch Natural dles Dolomites Furlanes peia propi via da Fôr Disore/Forni di Sopra l "Truoi dai Sclops" (L Troi di sclopec") che conduj te n deslivel de 775 m tres plu enite tl parch tres pres da mont, su per glerons enfin sot les pizes dolomitiches con na bela veduda che arjonj aluesc ence les Dolomites ampezanes viadelà dal flum Plaf (Piave).
Te duc i paisc entourn l parch, enscí ence a Fôr Disore, él n zenter per vijitadours dl parch che sporj informazions y escurscions avisedes.
Cherta geografica dl Parch dles Dolomites Fu
rlanes, amarscé a arance.
