benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La Plie da Fodom: recordanza a Catarina Lanz ai 31 de messel 2004
scrit ai 02 August 2004 da les 10:11:31 da noeles

Cultura

 

Duc chi che azeteia la despartizion ladina, aproveia la politica fascista de Mussolini 

Paroles de Lois Trebo en gaujion dla recordanza di 150 agn da la mort de "Catarina Lanz, la joena da Spinges" ai 31 de messel 2004 a La Plie de Fodom en prejenza de compagnies de scizeri da dutes les valedes ladines y dles autorités

de Lois Trebo

I recordon encuei Catarina Lanz, conesciuda con l inom de Joena da Spinges, nasciuda a Al Plan de Mareo l ann 1771. Catarina Lanz ova defenù enlaouta con la fourcia la gliejia da Spinges. La gliejia, la religion, la familia fova per nosc antenac valch tant de gran che al paiova la mueia da jì contra l nemich risian la vita. De tel festes desche chela da encuei dess nes dé la ocajion da pensé do, sce chi valours che fova al temp de Catarina Lanz ciamò sacrosanc, vel ence aldidancuei o nia. Foto: scizeri da Urtijei. Zacan defenova i scizeri i confins. Encuei puecia y net deguna vijion interladina dla chestion.




1. I nes damanon mo duc: co se stala pa encuei  con la gliejia, con la religion, con la familia? La jent se interesseia encuei dorata puech dla religion, trueps se la ouj a sia uega, tres deplù families va en broda. Al ne dess nia demé ester i scizeri y valch pice grup a una de tegnì alaut chestes seves dla jent cristiana, valours che valova enlaouta per duc, per duta nosta jent ladina.

2. Y co se stàla pa con nosta  tera ladina che nosc vedli à enlaouta y ciamò da la 1.Vera defenù con les ermes? Al é na miseria messei cialé pro desche nost paisc vegn tres plu venus fora a jent foresta con degun liam con nosta jent ladina, che chier demé n bel post da mete via i scioldi. Al me vegn ert soura da creie che na pert de nosta jent sie deventeda tant engordia, egoista y materialista che ala é bona da vene fora pertes de si paisc: ciases, fabricac, cuartiers, terac. Baudi se astila na pert da gran oportunisc’ y da afarisc’ y ti ciala demé plu ai afars, ai scioldi y ne se fej nia ben die pensiers che tres deplù foresć deventa patrons de nosc paisc ladins.

3. Nos ladins on n gran debujegn da nes enconté plu gonot, da nes rejoné, da programé co che ala dess jì inant con l grup ladin spedicé su sun 3 provinzies y sun 3 diozejes. Ie rate che la unité sie la cossa plu emportanta per vigni grup etnich, cis per tant n pice desche chel ladin. Demé deberieda jiràla da avei  n davegnì plu segur. I nes vivon bele enscì truep massa dancialà y i manacion de vegnì tres  plu foresc' anter nos; empede nes lié adum vàn endalauter. I on demé bria de fé chela politica per nos che i todesc à fat per ei: tegnì adum, laoré deberieda anter duc i ladins dles Dolomites y mai la dé su, mai zede. Degugn ne dess se dé a la ilujion che does valedes se salve plu saurì che cinch. Ciuldì à mo Roma despartì su i ladins te 3 provinzies? Per nes desfé plu saurì. Nos messon endere laoré a na moda che la despartizion vegne elimineda, che duc i ladins ruve endò adum desche ai fova sot a l'Austria. Chilò preii dret i ombolc dles 5 valedes ladines da ester de coscienza ladins, de laoré duc adum per l medem fin, da se mete dant l program dla unité ladina che ne pò mai vegnì a mancé. Ai porta na gran responsabelté per l davegnì dl popul ladin. Ence sce al é idees desvalives - na cossa normala anter la jent - sun la politica de unité ladina déssen ester a una; vigni comun auda de pensé al souravive dl grup ladin entier y de dé sie contribut positif. Cis i scizeri che tegn alaut la unité de Tirol mess ence tegnì alaut la unité ladina vegnuda scarzeda da la politica; i scizeri dess se lascé audì publicamenter y scassé su cheles coscienzes che s'à bele lascé adorbé dal materialism, dal gran afarism che s'à deslargé fora soura Südtirol y duta la Ladinia.

4. L pont n.1 per vigni grup linguistich é dessegur l lingaz dla oma. L lingaz ladin auda da gnì rejoné te vigni familia che viv tla Ladinia, da gnì ensegné endertura te vigni sort de scola tla Ladinia, de gnì adoré te vigni gliejia desche lingaz primar y da les aministrazions publiches nia demé a ousc, ma ence per scrit. Olache la adoranza dl lingaz ladin é bele scrita dant, ma ne vegn nia respeteda, dess la jent se lascé su; samben dess ence i scizeri damané la plena respetanza de nost lingaz dla oma. I ladins à debujegn de massmedia ladins miours y plu cualifichés. La jent ladina mess giaté la poscibelté de giaté n post de laour dantaldut te si raions ladins.

5. Al é massa puech sce al é demé valch union culturala che se interesseia dl destin dl grup ladin entier. De chest vers à dessegur laoré truep la Union Generala con sie foliet La Usc di Ladins, perchel se meritassa la Generala da vegnì respeteda cotant deplù y da vegnì reconesciuda da pert dles aministrazions provinziales che ala podessa laoré con n majer sostegn finanziar y no demé moral. Dutes les lies y chi che laora per n majer liam anter i ladins dles Dolomites y per n renforz dl grup etnich ladin auda da vegnì daidedes da pert di comuns, da les provinzies y da les regions.

6. N pont de gran atualité é la toponomastica ladina che auda da vegnì respeteda te vigni valeda. Toponims ladins che é gnus metus ju te n auter lingaz per blot motifs politics auda da gnì lascés sun na pert. Nos podon demé ester a una da lascé ence ti autri lingac i inoms di comuns y dles majeres frazions - dut l auter dess gnì adoré demé per ladin. Scizeri, scrivede chesta ghiranza sun vosta bandiera!

I é porté dant chestes valgunes ghiranzes, ajache ales é essenziales per l souravive cultural y politich di ladins dles Dolomites. I messon fé dles dutes per les arjonje sun l ciamp politich. Chestes auza la identité ladina y la coscienza ladina; ales ti dà ai ladins la convinzion de ester na popolazion enstessa alapér di autri grups etnics. Ajache i ladins é autramenter, méssei ence gnì tratés a pert, ai auda da giaté duc i derc che i autri à dagnora abù.

Ciamò n iade mie apel  a les unions culturales de laoré con dutes les forzes adum per arichì y renforzé nosta cultura, nost lingaz; ence  n invit de cuer ai ombolc ladins che ei se enconte con n program atual che à desche finamira l reconesciment di derc che i speta a duc i ladins dles Dolomites. Al é dessegur dret se enconté per rejoné dl trafich, ma nost souravive desche ladins depen dal tratament politich che i ladins giata, da les rejons che ti vegn dedes, dai derc che l grup á. Demé chisc i garantesc n davegnì plu segur. N popul che é vegnù partì su te 3 provinzies contra sia volenté - auda de vegnì endò lié adum. Al é oblianza dai oms politics da varì la plaia dla despartizion ladina con i conduje endò adum.
Duc chi che azeta la despartizion di ladins, aproveia la politica de Mussolini - Divide et impera! (La despartizion é gnuda decreteda dal rejim fascist dl 1923, ndr).
Degun om politich no ladin no todesch ne pò ester a una con na tel ingiustizia fata ai ladins dles Dolomites. Perchel él da speré che ai deure i uedli y deide i ladins tó demez l tort fascist. Demé enscì pò l davegnì di ladins endò florì.

De plu sun Catarina Lanz:

 La Muta da Spinges: 150 agn da sia mort, fac die asconus via

 N pice cheder storich sun i avenimenc a Spinges

 Museum Ladin Ciastel de Tor: lerch dedicheda a la eroina ladina


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.349 seconc