Mussner: "Cesa di Ladins" y espropriazion, dut nia veira!
Mussner claresc te na comunicazion sia posizion
L assessour ai laours publics y a la scola y cultura ladina, Florian Mussner, claresc te na comunicazion deda fora enier dal ofize stampa provinzial valgugn ponc per cie che reverda les discuscions y les polemiches entourn la "Cësa di Ladins" a Urtijei vegnudes su ti ultims temps. "El enstes" - enscì lìejen tl comunicat stampa - "à tout l'iniziativa de mete a jì l'enconteda di 4 de dezember 2002 a Urtijei. El ne à mai rejoné de na espropriazion no sen y no tl davegnì dla Cësa di Ladins coche an ti tira dant". Sul retrat: l assessour Mussner.
Per cie che reverda la chestion dla "Cësa di Ladins", recorda Mussner l contegnù dl'enconteda abuda ai 4 de dezember 2002 a Urtijei: "Ie me é enconté con i responsabli y é encorajé sciche prum l'enconteda; te chesta ocajion él vegnù fat fora de se enconté tl meis de merz 2003 endò per ruvé a na posizion con chela che duc po ester a una. "Entant l'enconteda él demé vegnù rejoné che tl caje che l Museum de Gherdëina dessa vegnì trapiné demez da la Cësa di Ladins, dessa la costruzion nueva ester n frabicat publich", spliga Mussner. El se destanzieia perchel da posizions che ti à metù tla bocia na espropriazion. "El ne à nience mai dit che tl caje che la Cësa di Ladins essa da giaté n contribut publich per la derturazion, che la proprieté dla imobilia dessa passé a la provinzia o al comun", sotlinieia l assessour Mussner.
