Demé n fruz de colaborazion culturala ne basta nia

Touta de posizion de Carlo Willeit sun l Dí ta Andrac - A la Generela ti spétel dessegur n post a la per dla conferenza di ombolc

La bela paladina storica y naturala y la bona organisazion se essa merité plu entusiasm y magari ence n puech de plu jent entratant la pert ofiziala. Na platea dorata passiva a scuté su la bela messa, ma i descursc ofiziai dut auter che esprescion de na identité segura y unida. L plu davejin al debujegn di ladins é magari ruvé siour plovan Fonso Clara con sies paroles de invit a mete i coliamenc tres i joufs tla dreta lum y da ti dé a l'unité ladina plu emportanza. Sce n valgugn dis dant ova l president dla republica splighé ben la desferenzia anter na comunité culturala y na comunité veira y propria (sozio politica), jiva fora i descursc de Andrac sun l desmostré l contrar.

An á dit che la colaborazion culturala basta per fé union, comunité ladina. Scempl da capì, che colaborazion fajonse ence anter jent y comunités dl dut desvalives. Demé puec raprejentanc à auzé fora l debujegn de na basa sozioculturala y politica ti dan plu lerch a la Union Generala enstessa.Nia da souraudì y souravedei che i patrons, les  provinzies con si strumenc politics, les istituzions provinziales y i comuns vuel ti dé sia cultura, sia organisazion, sia unité o divijion ai ladins. Crié da de foradecà y da la su ju organs politics de direzion de na comunité zenza fondamenta soziala y politica  vuel di controlé l status quo de divijion y de sotmiscion y nia truep de plu. L'unica dreta funzion de chisc organs é la promozion y l sostegn dla comunité te n raport de consens y de colaborazion con dutes les organisazions ledies de chesta comunité.  Anter chestes ti spétel dessegur a l'Union Generala l prum post con na parola almanco a la per dla conferenza di ombolc.

Carlo Willeit -LADINS