benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N consei per na bela roda da d'isté
scrit ai 20 July 2004 da les 21:42:29 da noeles

Natura

 

Olache les lors abitova dant da 80.000 agn 

Les lors dles Conturines, l "URSUS LADINICUS", é aldidancuei desmentiedes via, ma al paia la mueia de jì su n iade

D'isté cadrieiel sun i trois y les semenes dles Dolomites milesc de turisc', una na roda él endere dessegur puec y degugn che fej: na vijita al ander dles lors tl Valun dles Avares tles Conturines/Fanes, una dles gran marevueies dles Dolomites. A la fin di agn '80 y tl scomenciament di agn '90 fòvel sté la gran novité che ova fat la roda dl mond. La descuerta ova delot na ona de entusiasm per la paleontologia y la geologia dles Dolomites. Dedò s'à dut cant endò plan, plan achieté via. Ma nia daldut: les assoziazions turistiches dl'Alta Badia organiseia dutaorela vigni ann escurscions videdes su dal ander misterious che an pò te chestes ocajions ence  vijité enfin itensom, olache al é asconù la "Raieta". L Valun dles Avares anter les Conturines.


L ander fova bele da zacan conesciù, ma degugn ne s'ova enfidé ite te cheles scurités y te chel subuì. Empermò ai 23 de sember 1987 l'à Willy Costamoling, ostier da Corvara, vagheda y cie che al à vedù itensom fova sensazional, sternus via per fonz picòvel dlonch fora cefs y osc de lors. La noela à fat la roda dl mond y les universités s'à fat inant per studié la sensazion, dantfora la facolté de paleontologia da Viena con l dr. Gernot Rabeder. 
Al à atira sapù da ti dé n inom a la lors, al fova osc dl ursus spaeleus, la lors di andri, entratant denominé Ursus Ladinicus, davia che da studes plu aprofondis àn vedù che les ossadures é mendres dles autres lors di andri, da reporté al adatament dla lors al clima a la mont. Per sconé l ander (za. 200 m lonch) él vegnù saré ju con does feriedes, una atira tl meteman y l'autra en valgugn metri plu enite per impedì che persones vae ite zenza autorisazion. Tl temp che al é vegnù fat les escavazions scientifiches àn tamben metù su n pice agregat dal strom y lumes tl ander per luminé l intern. Ma al é empò zenzauter miec da se tò do ciamò na lum da gaiofa. La posizion dl ander é bendebot dezes da les semenes de Fanes. Chesta é ence la gauja che degugn ne l'à mai esploreda enfin al ann 1987, canche Willy Costamoling che rabiva a l'archirida de colec (fossils),  à devent la tema dal scur y é ju ite.
 
L troi (la semena)
La semena per ruvé su conduj defata do Col de Locia (la porta da San Ciascian te lors dles ConturinesFanes) via sun l'autra spona dl ruf y s'entorcoleia spo su anter de gran taces de barantli y crepes enfin su tla pruma gran majiera. Chesta vegn sareda ju sunsom da n ponton che pèr che sare ju l troi da jì inant. Da jì viadedò su rùven endere dorata saurì tla seconda gran ciaolera (Kar): bludra, con glereis enorms y zenza vegetazion, n mond dut nuef, solent, desman y con degunes fueres de jent. Demé l rondenì dla ousc y valch pera che drumbla ju romp vignitant l gran chiet. Te n parei sunsom a manciancia veiden bele da dalonc l parei con l gran portal misterious dl ander. Ence sce al pèr damprò él endere empò ciamò valgamia de troi da jì su. Tl ander enstes ne él plu degugn osc dl "ursus ladinicus" da vedei, ma dedò pòn eventualmenter vijité l Pice Museo Ladin a San Ciascian. Ma nia manco demarevueia é l ander enstes per sia grandeza y les formazions de sinter y de pera regorenta (toghe). Al é l ander plu alauta tles Alpes olàche an à giaté osc de chestes lors. Al é  situé a ben 2.800 m de auteza. L ander, chest veiden da la conformazion geologica, s'à formé tl temp che les forzes dla tera lubriva su les Dolomites desche an veid da la souraposizion dla crepadura. Ai temps canche les lors di andri vivova te Fanes (dant da 80.000 enfin a 40.000 agn) fova l raion dles Conturines ciamò n ciadin (na fopa) verdient y plajoul con vegetazion da mont. Aldidancuei él depierpul demé plu lasteis. Enlaouta ne fòvel nience degunes vals sotes, fergnons y pales ertes desche encuei. Chest aspet à la contreda empermò giaté con les glaciazions dant da za. 20.000 agn, milesc de agn do la mort dl'ultima lors. La forza dla glacia y dl'ega a permò soulcé fora l crep. L ander é sté la tana per truepes generazions de lors. Al é vegnù giaté dorata trueps dents da lat de lors joenes, cie che confermeia che ales vivova te chest raion soura dut l ann, arlevova si "lorsins" y sourainvernova tl ander. Perchel messova l clima ester cotant plu ciaut y selt a chestes autezes. La lors dles Conturines ne se nudriva nia de cern, ma dantaldut de plantes,  de bromores y de fruc. Foto: la "Raieta de Fanes" é asconuda tl scur dl ander.
 

Les escurscions videdes vegn ciamò fates: ai 22.07.2004, 29.07.2004, 05.08.2004,12.08.2004, 19.08.2004, 26.08.2004 y 02.09.2004

Semena (troi): sfadious, da jì él za. 6 ores,  deslivel: 800 m,  post d'enconteda: da les 08.00 pro la Capanna Alpina/Armentarola - S.Ciascian - Arciaseda: devers les 16.30. Al é da se tò do valch da mangé y na lum da gaiofa - Al va debujegn de de bogn ciauzés da trekking y guant da mont. Acompagnadour: Walter - Priesc:  € 4,00 - mutons enfin ai 14 agn gratis

 


 
Liams emparentés
· Deplú sun l tema Natura
· Chier te noeles


L articul plu liet te chest tema Natura:
N consei per na bela roda da d'isté


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.369 seconc