Some de na nuet d'isté

Spetacul teatral y musical per talian y ladin fora de na interpretazion ledia dal medem titul de William Shakespeare - Dai 26 de messel ai 17 d’ aost 2004 tla Val Badia, te Gherdeina, ta Fodom, tla Val de Puster y a Bulsan

Per l isté 2004 se tol dant l’Assoziazion culturala Erehwon de porté inant l ’ativité teatrala metuda man dl 2003 y penseda aposta per l raion dla region Trentin-Sudtirol. L fin é chel de aprofondì y slarié fora l confront anter de plu cultures y da lié la tradizion con la inovazion - sciche al é bele gnù prové fora tl spetacul "I creps sclauris". Chest ann àn tout la dezijion de ne laoré nia sun na liejenda dl post ma sun n gran toch classich dla leteratura teatrala: "L Some de na nuet d’isté" de William Shakespeare, a na maniera da confronté i idioms dl post y sia leteratura culturala con l lingaz y la cultura adorés te n toch de teater reconesciù universalmenter.

Foto touta da n'autra raprejentazion de "Midsummer's night dream/Some de na nuet d'isté"

La richeza y la desferenziazion fora de mesura che vegn dant tles operes de Shakespeare (cossa che les mantegn tres modernes), permet de les interpreté te na clef contemporana y de les adaté ales carateristiches culturales dl raion olache ales vegn portedes dant, y l Some de na nuet d’isté pèr fat aposta per vegnì ponù amesa la natura y i bosc de nostes valedes.

L Some de na nuet d’isté conta la storia de cater joegn liés te n raport de sentimenc entorcolés, ma che vegn scassés y archités su da les families y da les leges dl post. Canche ai damana l grof de apajé via la chestion ti dìjel de respeté la lege, zenza méssei s’un jì tl esil. Pervia che ai refudeia de se arbandoné a si destins cruedesc tol i cater enamorés la dezijion de s’un sciampé te bosch. Depierpul é n grup de artejans tl laour de enjigné ca n spetacul teatral per la noza dl sovran che gnirà tost festejeda y ence ei tol la dezijion de jì te bosch a fé les proes. Ma l bosch é desturbé dal stritoz dl re y dla regina di elfs, stritoz che toca dut cie che ti sta entournvia: joegn enamorés y artejans laprò. Y enscì, anter juesc, coionaries y de tel pices vendetes y con l aiut de si strionec ruva les creatures dl bosch a sciuré sotissoura y a mescedé i sentimenc de vignun. L strionet endere ne vala nia da tegnì su plu che entant: al orì dl soredl dl cuart di, dant la noza dl grof, messarà l strionet se desfanté. A la fin se mesceida i pers sciche al auda, enscì gniràl festejé en la nuet de mez isté trei nozes: chela di cater joegn y chela dl re, festejedes con l spetacul tragicomich di artejans.

Te nosta interpretazion déssel endò dé tl uedl n confront, ma chest iade ne se tràtela nia de n confront anter monds desvalifs, mo ben plutost anter de plu manieres de vedei l mond. Te nost „Some“ é Atene (l „paisc“ da olache i cater joegn s’en sciampa) l post comané da la vijion dl mond di gragn, na vijion true massa reala y concreta, governeda da regoles y da starité, olache i sentimenc ne n’à nia la poscibelté de gnì fora; l bosch, depierpul, é n post fantastich, destrat anter l some y la realté, olache al é la liberté y la trasgrescion che comana y olache al se fej lerch i sentimenc plu stersc, sciche sce i joegn enamorés vivessa te chi puec dis y te cheles pueces nuetes che ai passa ilò, duta la tempesta de emozions y chel scassament di sensc che carateriseia la puberté. Te duta chesta desferenzia ne déssel ester degun giudize: sce l mond di gragn é massa stare y manacia de sofoié i sentimenc, é chel di morcs massa trasgressif y l risch che an sent fora chilò é chel de se perde tles emozions.

L spetacul fej pert de n percurs te chel che Erehwon se festidieia de proieté y de organisé evenc culturai nascius tres la colaborazion de profescionisc' dl spetacul provegnenc da posc’ desvalifs y artisc’ dl post, chest per realisé na colaborazion interculturala y interdisciplinara che vae ben per l post. Per respidlé chesta realté é l spetacul gnù realisé per talian y per ladin, cialan de giaté soluzions teatrales – sotliniedes da la prejenza dles mujighes originales portedes dant dal vif – che dess superé les dificoltés che podessa gnì a lum tres la prejenza de de plu lingac. Per cie che reverda l stil y i contegnus va l spetacul ben per gragn y per joegn.

Projet Licia Dragotto, Valentina Kastlunger; traduzion y adatazion dl test Barbara Valli; traduzions per ladin Daria Valentin; regia Benedetta Frigerio y Valentina Kastlunger; joblers Daria Castellini, Erika Castlunger, Benedetta Frigerio, Aram Kian, Bernardetta Nagler, Mauro Pescio, Pietro Pilla, Alex Valentini, Giulia Valli; musizisc’ y joblers Andrea Benini, Christian Pescosta, Roberto Zecchinelli; mujiga y adatazions Alessandro
Trebo; scenars y costums Alexia Engl e Julia Libiseller; grafica y assistenza ala scenografia Ursula Tavella; lums Paolo Latini; organisazion Licia Dragotto.

L projet é gnù realisé con l sostegn de:
Assoziazion turistica de Al Plan, Fondazion Cassa dl Sparagn de Bulsan, Istitut Ladin “Micurà de Ru”, Museum Ladin “Ciastel de Tor”, Provinzia Autonoma de Bulsan.

D'enjonta à daidé:
Assoziazion Culturala Il Talaio, Assoziazion turistica Alta Badia, Comun de Corvara, Comun de Fodom, Comun de La Val, Comun da San Martin, Comunanza Ladina de Bulsan, Consei Cultural tl Comun de Badia, Radio Gherdeina.

Calender

Informazions pro:
Assoziazion culturala ErehwoN
Streda Antersì, 5 - 39030 Al Plan de Mareo (Bz)
tel. 349 4449431 - mail@erehwon-info.it

Sia plata internet:  http://www.erehwon-info.it