benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Tant bel che al fova zacan
scrit ai 19 July 2004 da les 23:47:36 da noeles

Cultura

 

Da chesta sajon jìven zacan sun mont 

Setours y tiradums se sfadiova via per l dí, da seira se confortòven de jí te tablé tl fen a paussé

Da vedlamenter encà é la fin de messel y de aost dagnora stés i meisc che duc i paurs jiva sun mont y enscí éla steda enfin entourn i agn '60. Spo án metù man de lascé de sié tres deplù pres, samben empruma chi plu da nia, chi sfadiousc y desman, chi dalonc da streda y rie da i jí permez d'invern a se tò l fen. Ciamò dant l'ultima vera, canche al ne fova nia mascins y demé puec ciavai fova l jì a mont n gran laour y joegn y joenes podova se davagné valch spenora (bonaman) da jí setour y tiradum su per chi prés alaut dlongia i biei creps su per cheles pales ertes, sfadiouses y sovenz ju per chi lastons pericolousc y da temei oláche al fova bon adoré i grifs per sté su.

I tablés da mont, n iade plens de vita, aldidancuei arbandonés. Enfin ai agn '60 busiova la vita da zacan ciamò. Desche l florí de soredl, al resta na bela recordanza.



Do che l paur ova ruvé da se fé ite l fen di prés da ciasa, fòvel da s'enjigné la baschira: fauc y faucé, i restiei mez lerc, i lenzuei da fen, mai y ancugn da bate la fauc y l martel, dut gniva lié adum y i ei se l metova sun la sciabla y piova via. Datrai ence na luesa da fen y l manarin da fé legna vegniva adorés. Les eles enjignova l ceston con les massaries da cujiné, i carniers (scarnuc) da les farines y dai bocons, la fanucia da smauzé l scarté (Muss), l smauz y la cialdira da 3 piesc. La gran fancela se l metova sun l spinel y con les cioures che vegniva do dlon sautan y s'aroban n cipl d'erba can chilò, can ilò jívela do. Les autres tiradums portova i restiei strenc, chi da tré do, la baricia da l'ega y e.i. Cujiné vegnìvel sa mont te ciasota, n valgunes peres amesa ciasota fova l frogoré - ilò fajòven l fuech. A seconda che al soflova l vent fòvel datrai n gran fum da messei s'en sciampé. Cujiné vegnível jufa, scarté, jopa arestida, ega bolida, bales, polenta, gnoc, riji, puessel, pasta y pozesc. A marené se sentova duc sun n col dant ciasota oláche an podova ence se giaude l bel panorama. Da doman levova duc abonora (adora), an batova la fauc o jiva bele a sié ciamò dant gosté. Lavé se lavova duc con ega frescia de fontana y con chesta se parova ence duc la seit y ala ti dova forza da sté dut l dí su per chi erc a sié y a restelé. Ence sce ai giatova sovenz mel ai brac, al spinel y ai piesc ne se baudiòvei pa nia, ai messova pa demé la tré inant.
Da seira spo se confortova vignun de podei jí tl fen a paussé. Cie bon dormì che chel fova anter i lenzuei da fen, olache l fen te ficiova dlonch y les furmies passova soura l mus via y l vejin roncedova! Chi che l à prové savessa truep da ves conté. Angela Castlunger/Colfosch.
I restiei é sen te n piz. Foto touta da www.ladinia.it (Mario Clara).

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.380 seconc