benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Museum Ladin Ciastel de Tor: L artist Richard Agreiter
scrit ai 17 July 2004 da les 16:13:09 da noeles

Cultura

 

N tesour da tegní cont

La Ministra per Afars Foradecá dl'Austria Benita Ferrero Waldner se á tout la bria de vegní enstessa a daurí l'esposizion de Richard Agreiter: n ladin ruvé forapert con les opzions de Hitler-Mussolini dl 1939 vegn endò a ciasa - Per el él sté l'esposizion plu scomoventa

La Ministra per i Afars Foradecá dl'Austria en persona, dot. Benita Ferrero-Waldner, á enaudé enseira (16.07.04) l'esposizion de scultures de bron dl artist tiroleis-ladin Richard Agreiter dal titul "Mister dla forma"  tl Ciastel de Tor, senta dl Museum Ladin.  Truepa prominenza politica dla provinzia s'á fat permez. Benita Ferrero-Waldner conesc l artist dret ben personalmenter bele da trueps agn y con sia partezipazion a la enaudazion ála volú sotrissé l gran apriejament che ela sent per l artist. Richard Agreiter ti souralascia duta sia opera al Museum Ciastel de Tor.

Durnwalder, la Ministra per Afars Foradecá dl'Austria, Benita Ferrero-Waldner y l artist, Richard Agreiter.



A la pert fova l president dla Jonta provinziala Luis Durnwalder, la assessoura Sabina Kasslatter Mur, l assessour ladin Florian Mussner, l president dla Corporazion di Museums Provinziai Bruno Hosp y sie vize y president dl Museum Ladin, Heinrich Huber. La Ministra Benita Ferrero-Waldner fova apeina ruveda adalerch en valgunes ores dant da Bratislava, capitala dla Slovachia, al aeroport da Bulsan. Ala á laudé l artist Richard Agreiter, che ala conesc dret ben personalmenter, descrivan sies operes con na frasa de Balzac: "L'ert ne dess nia copié la natura, ma ester sia esprescion".  La Ministra s'á desmostré ence dret interesseda y informeda sun la comunité ladina, empermetan  de se engajé  ence tl davegní tla funzion dl'Austria desche supervisoura dl statut de autonomia. Les cultures y i lingac desvalifs é n gran arichiment per l'Europa, enscí la Ministra: tegnide perchel cont dl ladin! Deberieda con i ghesc' d'onour ála enstessa  taié la veta daurin l'esposizion. Per l artist Richard é chesta steda la esposizion plu scomoventa, plu de cuer, con truepes emozions. Adenjonta de se sentí da ciasa y ladin, ti souraláscel sia colezion personala de operes al Museum Ladin Ciastel de Tor tres la fondazion "Richard Agreiter", desche al á fat alsavei te chesta ocajion.  L'idea de mete fora les scultures de Richard Agreiter tl Ciastel de Tor é orida dai contac che l artist á abú con l diretour dl museum, Stefan Planker. Con chesta mostra vuelen ence ti dé l benodú a n ladin che per rejons storiches á messú arbandoné la tera ladina.

Richard Agreiter

Agreiter y Aiarei (= sia verscion ladina) é cognoms cotant deslargés tla Val Badia. Entrami i genitours dl artist Richard Agreiter fova dla Val Badia, plu avisa l pere Piere de Fornela d'Antermeia y sia oma Filomena Pitscheider d'Alton da Colfosch, jus a sté lafora per gauja dles opzions "Hitler/Mussolini" dl 1939. El é nasciu ai 25 de merz dl 1941 tla Boemia. L  medem ann se trasferesc la familia definitivamenter a Steinberg am Rofan tl Tirol dl Nord oláche ai compra n luech da paur. Richard Agreiter ne se sent nia demé de avei raijes  ladines, ma al dij giustamenter  "ie son n ladin", ence sce al ne á mai podú emparé l lingaz, davia che sia oma á rejoné empera demé todesch y sie pere fova truep demez da ciasa.
Do avei frecuenté la Scola d'Ert a Dispruch ti agn dal 1955 al 1961 fòvel segur che chesta fova sia streda y per chesta rejon él ju a emparé l ert pro n maester scultour, n cert Gruber, davejin a Wil dlongia St. Gallen tla Svizra. Con n stipende dl Land Tirol ál spo ciafié da se scrive ite a l'Academia dles Beles Ertes de Bruxelles oláche al á sclut ju i studes con les mioures notes. Do i studes vál spo zeruch a ciasa a Steinberg am Rofan oláche al viv y laora. Les scultures nasc da sies mans: al les dessegna, les modeleia y les cola enstes te bron. Al é un di puec artisc' che á enstes n fourn per deleghé bron. "L artist mess ence sué" é la minonga de Richard Agreiter, "l colé é n laour sfadious, ma da l'autra pert ciáfien enscí de reelaboré, de mudé ju y de concé fora damprovia detais tles scultures".
Günther Moschig, storich d'ert, dij che propi l fat che l artist cola enstes l bron, ti pieta la poscibelté de romagne tresfora te n dialogh con l material y la scultura.  Conescian afonz duc i ciantons y i misters dl material, enscí Moschig, náscel les formes particolares dles scultures de Agreiter.
I laours artistics de Richard Agreiter peia via da formes geometriches dorata scemples: da chela ovala, da chela a cheder y dal triangul. Les formes davertes é avalivedes con formes sclutes, les formes plenes con formes  vuetes. Te certes ocajions lascia l artist ence ester la coleda desch'al la urta: do che la formera é vegnuda touta demez da les scultures, romágnel restogns de bron che vegn normalmenter eliminés, ma Agreiter i lascia. Enscí p.ej. pro la scultura "Der große Hai - l gran scual".  I restogns de bron deventa te chest caje scaies o tl caje dla scultura "Piscis" devéntei dents de pesc. Formalmenter se muev l artist anter l'ert figurativa y l'astrazion. Al raprejenteia dantaldut la figura umana, ma taloutes ence l tier y la planta desche manifestazions dla omour vitala. (la omour = linfa de vita). L stamp dl'ert de Richard Agreiter oresc y floresc te n temp che al roda tl'Europa truepes tendenzes avantgardistiches y liberalistiches desche la pop art, la Op art, la body art, l'ert cinetica enfin a les formes plu stravagantes. Al ne se lascia endere nia condizioné da chestes. Per el, desche la storica d'ert Sylvia Mader dij, él plulere sté n artist desche Henry Moore n ejempl. 
 

Fotos de n valgugn laours de Richard Agreiter.

La mostra romagn daverta enfin ai 22 de aost 2004 con chest orar de daurida:  dal mertesc a la sabeda, da les 10.00 ales 18.00, domenia, da les 14.00 a les 18.00, de lunesc sclut.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 3.66
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.420 seconc