Cie fadia da mete ite l fen chesta outa!
Prest vigni dí pluevies, temperatures basses y en l'edema passeda enfinamai n blauch de neif enfin ju a 1.500 m - I paurs se la baudia dassen
L rie temp de chesta outa à sceché dassen i paurs a la mont y chi ladins en particolar che met man, aladò dl'auteza, entourn i 10-20 de jugn da sié fen con prés prest dlonch soura i 1.200 m. An á metú man, ma an se fej ert da ruvé. L fen é bele dadie plu che madur y perd sostanza con vigni di che al passa.Temperatures dret basses, pluevies, pres biei moi, n ciel plen de nioles scures y manaciouses (La Ila - Alta Badia), feter vigni di che al tampieia: chest l cheder encherscioul tles ultimes edemes.
En la pruma edema de messel él enfinamai vegnù ju n blauch de neif enfin ju a 1.500 m. La neif ne à nia taché, ma les temperatures s'à samben desfredé. Sce normalmenter òven sturté dlonch plu o manco al scomenciament de messel, se tírela chesta outa adenlonch. L fen manacia de enfraidì sun pré o mess vegnì condut te majon ciamò tueme y destenù fora, na straciaria. Demé chi paurs che se à enjigné n implant da ventilé y da secé l fen, à ciafié de conduje te majon la majera pert adertora.
Dret straceda y da encresce donca: truep fen podarà demé plu vegnì tout ca da sterne, dij n paur da Lungiarü. Ence con les mascins se féjen ert da laoré sun l ciampopré trafonù d'ega; an slizia y i tratours fej striares (loses) che al é n spavent. An mess demeztroi mete averda, dij n paur d'Antermeia. An ne se recorda nia lere temperatures tant basses d'isté, an leva con 4-5 degrés dadoman, n let da plomin y na coutra vuelel ester, dut l contrar dl ann passé. L baudiament é gran, "9 meisc neif y glacia y 3 meisc freit onse", la tol con umor n paur. Al suzed. Che i on da fé con n temp estrem vegn confermé dal fat che al toma ju demeztroi pedrons dai creps dles Dolomites, en les edemes passedes da Crep da les Dodesc ta Lungiarü y ta Puez, via n'Ampez tl grup dl Naerou, tl grup dl Cier sun jouf de Frera y enier da La Cansles vian Gherdeina. L'ega dla pluevia che trafon tles sfenadures, l freit, la glacia y ones de ciaut fej jì cialà l crep.
