benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Museum Ladin Ciastel de Tor: lerch dedicheda a la eroina ladina
scrit ai 13 July 2004 da les 21:07:12 da noeles

Persones

 

Catarina Lanz á sen n post d'onour ence tl museum 

Enaudazion con l President dla Jonta Durnwalder y autorités en domenia, ai 11 de messel - L storich Craffonara á referí de trueps detais nuefs

Con la prejenza dl President dla Jonta Provinziala Luis Durnwalder, dl President dla Corporaziun di Museums de Südtirol Bruno Hosp, de sie vize Heinrich Huber, dl assessour Florian Mussner, de autorités locales, dla mujiga "Catarina Lanz" d’Al Plan y dla bandiera di Scizeri de Mareo él vegnù daurì dantenier, domenia 11 de messel, la sezion nueva dl Museum Ladin Ciastel de Tor, dedicheda a Catarina Lanz, l’eroina de Spinges. L storich, prof. Lois Craffonara, à conté su n valgugn aspec fora dla vita dla joena marora che á vivú al temp dla ocupaziun franzeisa de Tirol. Al á conté su episodes bele conesciudes, ma laprò à Craffonara ence abú da ti pité al gran publich valch element che ben puec conesciova denant, nience la jent d’Al Plan. Foto: i scizeri da La Pli de Mareo á fat da cornisc a la daurida y la mujiga "Catarina Lanz" d'Al Plan de Mareo á sport permez sons da festa.



A la fin à Craffonara recordé che entratant i diejenés él ence vegnú plu sovenz prové de falsifiché la storia, ti ascrivan i fac eroics dla "Muta da Spinges" a d’autres persones, descreditan Catarina Lanz. La daurida ofiziala dla sezion nueva con l tai dla veta é vegnuda fata da Luis Durnwalder, acompagné da Bruno Hosp, Florian Mussner y Heinrich Huber che á spo vijité desche prums la mostra, metuda fora tla picia tor dl Ciastel de Tor. La sezion é dret scempla, fata de n "cheder che rejona", de na vidrina con does sables napolioniches y de na tofla d’informaziun trilinga. L cheder reporteia la onoranza da pert dla raprejentanza dl Prinz-Vescul da Persenon en onour di eroes da Spinges. Con tecniches video y de computer é i personajes de Catarina Lanz, dl raprejentant dl Prinz-Vescul y de n paur vegnus animés y conta de coche ala é juda enlaouta.

Diego Clara

Chest pice cianton recordará da sen inant Catarina Lanz tl Museum Ladin a San Martin. L cheder de Jan Batista Rudiferia raprejenteia Catarina Lanz desche ala vegn audida dal Vescul, n detai dla vita de Catarina Lanz che mess ciamò vegní sclarí ti archifs desche l storich Lois Craffonara dij.

Liam al referat dl dr. Lois Craffonara: La vita de Catarina Lanz

La mostra durenta de Catarina Lanz é sen daverta al publich entratant i orars de daurida dl Museum Ladin Ciastel de Tor, che é: dal mertesc a la sabeda, da les 10 ales 18, la domenia, da les 14 a les 18. Lunesc sclut. (Da la domenia dl Olif ai 31 de otober 2004)


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Cultura

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.415 seconc