Unis per l reconesciment dla Generela
En domenia, ai 18 de messel, Di dla Unité Ladina a Andrac ta Fodom - Nani Pellegrini: sce Trent y Belun reconesc la Generela, cie fajarà pa Bulsan?
L president dla Generela, Nani Pellegrini, é l veir "deus ex machina" dl "Di dla Unité Ladina", che vegnirà zelebré en domenia che vegn, ai 18 de messel, entourn al ciastel d’Andrac. Deberieda con el á laoré n comité de organisazion che s’à abiné y é sauté lonc y lerch a na moda che dut sie enjigné ca endertura. La manifestazion se vestirà de trueps aspec simbolics, dantfora chel dla particolarité di Ladins dl Sela y dl debujegn de unité. Sun chisc temesc ti onse fat en valgunes domandes a Nani Pellegrini, President dla Generela.
Doi mutons fodoms ciutia fora dal Ciastel d'Andrac.
Emprumadedut, percie eise pa tout la dezijion de fé l’enconteda belavisa entourn l Ciastel d’Andrac ?
Nani Pellegrini: L Ciastel d’Andrac à na storia che toca la maiour pert dla Ladinia, ajache al fova de proprieté dl Prinz Vescul de Persenon. En plu á l ciastel albergé n gran personaje desche l Cardinal Nicola da Cues, l Cusanus, che é resté tla storia nia demé dla Ladinia, ma de duta la gliejia catolica. Per l’emportanza che chest ciastel à abù, merìtel de vegnì conesciù miec y zelebré de plu.
Cie segnificat ála pa chesta enconteda per i ladins di trei comuns sot a Belun?
N gran significat, sce an conscidreia la peripezia di Ladins de chisc trei comuns che s’à ciaté isolés dai autri do la despartizion sun trei provinzies y does regions con degunes atenzions y provedimenc per l mantegniment de sia cultura da pert dles autorités dassen desvalives. Al é n meso de fè capì a les autorités che nosta spezifizité storich-culturala é chela di Ladins dles does autres provinzies, de Bulsan y de Trent, che al é fauz pensé che la Ladinia tole ite demé les vals de chestes does provinzies.
Dantvia, l nuef Capocomun da Fodom, Gianni Pezzei, s’ova scontré sovenz con la Souraintendenza de Aunejia per gauja dles desferentes vijions sun la restruturazion y la valorisazion dl ciastel. Penseise che valch posse se mueve de chest vers ?
Per chel che reverda la restruturazion saràl rie che al se mueve valch da nuef. La Souraintendenza ova responù canche l Comun y les assoziazions da Fodom ova protesté y damané che al vegne metù su n tet per podei l utilisé de valch vers, che " l ciastel é na ruina y enscí àl da restè per respet dla storia". Ma an ne sa mai. Fodom mess se fè audì de plu."
Al s'á mudé l’aministrazion dla Provinzia de Belun. Penseise che al se mude ence valch tl astilament dl vers de chel che i trei comuns se ghira: spezifizité, reconesciment dla Generela y atenzion ti confronc dl Istitut da Col Santa Lizia?
I speron de sci. I jiron a ti recordé ai dirijenc nuefs che la Provinzia enstessa, tla delibera dl Consei Provinzial 30/244 del 2001, reconesc la spezifizitè culturala di trei comuns ex-tiroleisc y che chisc fej pert dl’Union Generela di Ladins dles Dolomites, desche dagnora. I ne creii nia che la dirijenza nueva vuele se remangé o posse jí contra chesta delibera. Ala toca a nos spo de nes fè sentì y ghiré che ala vegne respeteda.
Sce Trent y Belun à dé desponibelté a reconesce la Generela, ciala Bulsan plutost de arferé. Co penseise pa de ti fé mudé idea?
N iade che ence Belun, adum con Trent, arà reconesciù la Generela desche assoziazion culturala transprovinziala, sarà Bulsan soula a ne la reconesce nia y al ne sarà nia saurí da dé na giustificazion. La Generela resta na istituzion culturala de coordinament transprovinzial y nience la conferenza di Capicomuns prospeteda, che é de natura aministrativa, podarà la sostituì. Al é does robes che pò convive y se completé.
Co é pa les relazions con l assessour Mussner?
Bones, sen n iade. L assessour Mussner fova prejent canche l ofize nuef de Presidenza dla Generela é ju a descore con l Landeshauptmann Luis Durnwalder. Chest à seguré de promueve y aumenté la colaborazion transprovinziala tl ciamp dla cultura y ence te d'autri ciamps.
Dant da puech él vegnù scrit te n articul sun l Corriere delle Alpi che i Ladins da "lafora" (Trent y Bulsan) azeteia saurì l’esistenza di neo ladins da Belun (chest él vegnù dit en gaujion de n conzert de n grup de mujiga dal Comelich te Fascia.). Cie nen penseise pa de chesta afermazion. Ela dreta enscí o él n tentatif de sauté soura ai trei comuns per chirì legitimazion delà dai confins, pro chi ladins che, anter l auter, é tres vegnus critichés a Belun?
Chest articul sun l Corriere delle Alpi ne é nia la minonga de nosta jent y i creii che al ne sie nience chela di Ladins de Fascia. Al é veir che la Ladinia ne dess nia se saré ite, ma an mess ti dé temp al temp. Sen n iade, sce an se delega fora te n colp, da encuei a endoman, cioda l pericul de omologazion de deventé real y an risia de ne podei nia plu gestì la situazion.
A cie pont ései pa i laours de reorganisazion dla Generela?
Ala va inant. Defata rejonaràn con n consulent espert de problems statutars y de reorganisazion aziendala. Spo vegniràl ciamò rejoné tl diretif dla Generela, i pense chest auton che vegn.
Per finì via, trei priorités che vos vedeis de majer debujegn te chest moment per i Ladins dl Sela ...
Unité, Unité, Unité.
Intervista de Lorenzo Soratroi
