Dut enjigné per la II. Val Gardena Ciasp
Sun Mont de Pana pò en domenia, ai 12 de jené duc se mesuré con i trei campions Molinari, Senoner y Fregona
La nëif, i concurënc y l cumité de organisazion ie anjeniei per la sgonda edizion dla Val Gardena Ciasp, la prima y sëula manifestazion cun la ciaspes te Südtirol. Nviëi a fé pea ie duc i nteressei, sibe chëi che va a pé che nce chëi che fej pea la cumpetizion agonistica. Chi che ne à nia nstës la ciaspes, les giapa da mpresté dal’Atletica Gherdëina che mët a ji la manifestazion. Nteressei possa pra l’iscrizion tl ufize de turism de S.Crestina nce bele se nuté su per la prima cumbinazion cun l Extrem Marathon.
Foto: campions dl Mond Hugo Senoer y Antonio Molinari se à bele scrit ite.
Autra manifestazions à chëst ann messé ti la zeder per la ciarestia de nëif, danter chëstes nce la 30esma edizion dl Ciaspolada. A Othmar Senoner y si culaburatëures dl cumité de urganisazion ti ala plu butà. Sun Mont de Pana iel nfati nëif assé per la garejeda cun la ciaspes y nsci pudrà nce unì fat na sëula raida de 5 km che ti va plu o manco do ala raida da pudejé. L unirà muet dala 11 danmesdì dan l Sporthotel Monte Pana.
Aldo dl nteres mustrà da chëi dal tlo se aspieta i urganisatëures de crëscer n cont dla cumpëida de concurënc. Chëst ann che la disciplina dla ciaspes ne ie nia plu tan nueva se aspieten che l sibe mo plu nteressei, dantaldut per la raida nia cumpetitiva ulache n se la cava saurì nce zënza n trainig aposta.
Atelc de gran inuem
Sëuraprò ala sperienza de na manifestazion sportiva te n cuntat strënt cun la natura pieta la „Ciasp“ nce velch per i atlec dl sauté. Nfati vëniel crì zachei che ie boni de ti vester ai trëi campions dl mond che se à bele scrit ite. L plu da temëi danter i atlec dla ciaspes ie zënz auter l trentin Antonio Molinari. Cun la ciaspes al bele venciù doi campionac dl Europa, trëi iedesc la Ciaspolada y un iede te Gherdëina. Molinari à pona nce venciù truep tl sauté da mont su, danterauter nce l titul de Campion dl Mond. Tla categuria Master 3 ie sun l Patscherkofel nce Hugo Senoner da Dorives deventà campion dl mond de sauté da mont su y nce ël ulessa se mescedé danter i primes sun Mont de Pana. Lucio Fregona à de setëmber venciù l Extrem Marathon sun la sciorta de Saslonch y nce per la garejeda cun la ciaspes te Gherdëina al bele mandà ite si iscrizion. Fregona ie campion dl mond de marcia da mont su y ie deberieda cun Marco Agostini dessegur l favorit per la cumbinazion cun la garejeda de sauté. Per la sgonda Val Gardena Ciasp iel unì anjenià pesc´ per na soma de 1.000,00 Euro.
L miëur danter „Ciasp“ y „Extrem“
La nuvità da chëst ann ie la tlassifica speziela che unirà metuda ju aldò di tëmpes tla garejeda cun la ciaspes y l Extrem Marathon. Tlo unirà tëut n cunsciderazion la tlassifica generela per ëi y ëiles. Chëi che se scrij ite per la cumbinazion dla doi garejedes paierà na mëndra iscrizion per l Extrem Marathon. Mplu iel udù dant pesc´ per ndut 700,00 Euro.
Nfurmazions y Iscirzions
Per nrescì velch de plu sun la Val Gardena Ciasp possen cherdé su l numer 328 689 83 45 o cialé sun internet sota la plata www. atleticagherdeina.it
Nteressei possa mo se lascé nuté su tl ufize dla Lia per l Turism de S. Crestina, tel. 0471 79 30 46, e-mail s.cristina@valgardena.it
