benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

50 agn Cesa di Ladins a Urtijei: restruturazion
scrit ai 05 July 2004 da les 14:48:30 da noeles

Politica

 

La Cesa di Ladins, sen dant na dezijion fondamentala

L assessour Florian Mussner tira ca la vertola che la provinzia ne finanzieia nia fabricac privac - L assessorat ladin te Südtirol promuev demé plu la "cultura fancela"

(j.p.) A la fin de aost complesc la Cesa di Ladins a Urtijei i 50 agn y per chesta ocajion minova la Union Generela tres sie vize-president Egon Vinatzer de giaté n bon iade i finanziamenc da la jonta provinziala, desche al fova gnú fat fora entratant na abineda de raprejentanc dla Generela y chi dla jonta tres l assessour Florian Mussner. Sclut fora l gran projet se fòven gnus sun n projet mesan. Ma sen pérel che al tome tl vuet ence chest ultim projet. 

Provinzia y comun de Urtijei ti sita a la "Cesa di Ladins". Union di Ladins y Museum Ladin ne vuel nia se vene y mess sen chirí fontanes alternatives de finanziament dla derturazion dla Cesa Ladina a Urtijei. L president dla ULG, Egon Vinatzer a manciancia y l raprejentant dl Museum.



      Al vegn endò a lum la vertola che la provinzia ne dá nia contribuc per la costruzion de fabricac privac, ence sce i ejempli a livel politich é n grumon. Davia che da enlaouta encá, da chela enconteda de merz dl 2003, y do la senteda dla delegazion dla Generela con Durnwalder y Mussner, tegnuda za. dant da n meis a Bulsan, ne án plu audí nia, se á dis dl'edema passseda Egon Vinatzer, president dla Union di Ladins de Gherdeina y vize dla Generela, lascé su protestan contra la jonta. La ocajion ti é gnuda deda dal Radio Sender Bozen che l'á cherdé su per savei desche ala stova con la chestion dl derturament dla Cesa di Ladins. La protesta é spo gnuda deda tres plu iadesc dal Radio Sender Bozen, ma nia dal Radio Ladin. En venders seira ti á fat la televijion ladina na curta intervista a Egon Vinatzer y l'á endò lasceda audí tl radio l di do. Ma dla protesta deguna pedia. Vinatzer á plu puecia creta che la empromiscion di finanziamenc vegne mantegnuda. An giatará i contribuc ordinars, ma nia de plu. Na cossa ria da capí. L debujegn de derturé l fabricat dla Cesa é grandiscim y al ne pò nia plu vegní sburlé inant. An messará pensé a d'autres soluzions per abiné via i finanziamenc. Dessegur nia saurí, ma an é sforzés, sce an ne vuel nia lascé tomé l laour de 50 agn alalongia dla Union Generela, de chela di Ladins de Gherdeina y d'autres Unions dla valeda. Al vuel ester n sforz de duc i Ladins, de duc i comuns Ladins, dles categories economiches y de duc i privac che a a cuer la cultura ladina y che souradut crei tla autonomia dla cultura. I savon duc olá che ala porta la "cultura fancela" y Mussner va de chest vers. 
      I porvon mo da vedei ite la gauja dl nò de Mussner al finanziament dla Cesa. La persona che á manco colpa é dessegur Durnwalder. El ova pu dé pro tla ultima senteda: ala se tratova de na soma anter i 2.500-3000 milions de euro. La maiour y la dreta colpa á la SVP de Gherdeina con a cef l ombolt de Urtijei, Konrad Piazza. El á tres dit de volei n toch dla Cesa y deberieda con el si amisc dla SVP. La Cesa é l frut dl laour de persones autonomes, che á n sie cef a mete man da Luis Trenker, ence sce al fova n gran todesch, ma tl vers dla Union di Ladins savòvel da laoré adum, zenza ti cialé al colour partitich dles persones che la tegniva en pé, na cossa chesta che la SVP de Gherdeina ne á mai volú imité y se á tres tegní fora. Mussner é daspavent debl con i stersc y al miena de ester sterch con i debli, ma al se fala. Al ne conta net nia y al mess demé fé l fant di autri, sté al orden de chi che l'á metú a ciaval. Sce al dij n scí, zenza autorisazion de si amisc, ti l féjei mangé zeruch, desche pro l caje dla Cesa.

       Al é oramai passé plu de n ann da la pruma senteda dl 2003 y Mussner essa ence podú entratant mete valch sun meisa. Fé ruvé adalerch valch rata de finanziament per podei mete man la costruzion. Encandenò: nia de nia. Deguna marevueia sce Vinantzer protesteia contra n tel comportament pro l Sender Bozen. Ma sen dijará endò Mussner che el ne á mai empermetú zeche. "Dut nia veira". La SVP vuel a vigni moda l control dla cultura per la zensura. Sce la Cesa fossa tles mans dla SVP, spo fóssela bele dadie dertureda y i scioldi regoressa. Bonamenter ne sá chi dla SVP de Urtijei nia da lieje. Sun l fabricat dla Cesa él scrit: Cesa di Ladins, chest vuel dí de duc chi che se sent Ladins. Al ne é nia scrit Cesa de Willeit, desche la SVP liej bele da agn encá. Per la SVP y sie fant Mussner auda la cultura da ester sot les grifes dla maioranza politica. Demé enscí deventa vigni stranudeda de poet n'opera leterara.
     Willeit á abú, chel méssen ti conzede, l coraje y l ortú de tegní su l bilanz provinzial per ti asseguré l finanziament al Aiut Alpin Dolomites, cie che ti é garaté. Aldidancuei rejona enfinamai la SVP de n servisc fondamental dl Aiut Alpin, de "ein unverzichtbarer Rettungsdienst". Per la Cesa di Ladins ál fat l medem. Chilò veiden clermenter la desferenzia anter na raprejentanza autonoma y na raprejentanza sot a ghirau. Mussner ne podessa mai fé chest, davia che al ne essa nia l consens dla SVP. Willeit stolova contra i gragn y Mussner contra i pici.

Liams a d'autri articui comparus sun noeles.net sun l argoment:

La Union di Ladins de Gherdeina spliga enscí i fac.
Al se trata de na despuscion.
Mussner: "Cesa di Ladins y espropriazion, dut nia veira!"
Perde la Cesa fossa n auter sclaf de sotmiscion - A cie titul damana pa Konrad Piazza perdonanza?
Deguna trieva entourn la Cesa di Ladins.
Willeit brancia do l'erma plu temuda: la votazion do grups etnics.
La storia dl museum à dutaorela da vegní.

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.357 seconc