Endoman, ai 4 de messel, al prum albié piarál via a La Ila la 18eisema Maratona dles Dolomites. Cie che fova pié via dant da 18 agn sun iniziativa dl'Uniun Rodes Alta Badia sco manifestazion per promueve l sport dla roda a livel local é deventeda entratant una dles maioures manifestazions de roda amatoriales de livel internazional. Ala cherda adalerch vigni ann n grumon de amatours dla roda tl'Alta Badia, nia demé garejadours, ma gonot tamben familiars y acompagnadours, emplenin i albercs badioc. "Na manifestazion che deida dassen da pié via con la sajon da d'isté" desche la ostiera de "La Majun" Rina-Mellauner Roberta de La Ila dij con gran contenteza. 

Tla senta dl'Uniun Rodes Alta Badia, tl Hotel Posta a Pedraces, végnel dutaorela partí fora les numeres da pié via. Les manifestazions de cornisc á bele scomencé en mercui. L temp endoman tles montes: da soredl y ciaut, ciel blef, ma al podessa se formé via per l dí nioles pesoces y al ne é nia daldut sclut fora valch picera juteda locala domesdí via. I garejadours á endò podù chirí fora anter 3 rodes desche vigni ann: la longia, la mesana y na Sellaronda curta. L raion sará bendebot busient endoman, 8.500 garejadours da 33 nazions, plu de mec talians. Les stredes vegnirá do y do saredes. Desche i organisadours dij fóssen saurí ruvés a passa 20.000, ma tlafineda méssel ence ester na fin per rejons logistiches. Passa 1.000 volontars mess ti fé l guern da pié via, sun troi entratant la gara y al travert dedò. La Roda vegnirá trasmetuda endoman da la RAI dal vif da les 06.00 a les 12.00 da mesdí con inanterite informazions soura natura, turism y cultura dl raion. N fat desplajoul é suzedú enier a Corvara y La Ila oláche al é vegnú arobé 6 rodes de valour de 6.000 euro l'una, n dann da parenté, deguna fustia di leresc. I Carabiniers aconsieia de mete averda y de cherdé atira, sce an veid zeche de sospet. Nia daldut contenc ne é i Fodoms con la manifestazion che ai veid plutost desche peis y empediment a la zircolazion, ma de chest vers é la organisazion dla Maratona en tratatives per tré ite miec dutes les valedes entourn l Sela. Entratant án bele sun l sit dé dant dutes les localités ospitentes. La manifestazion fej enscí vedei che al jissa debujegn na maiour colaborazion anter les valedes ladines entourn l Sela.

amainé = zureden, ermahnen/sollecitare

ORARS DE SAREDA DLES STREDES DLA 18EISEMA MARATONA DLES DOLOMITES 04.07.2004

Streda	Itinerar	Orar araté de sareda al transiament dl vers contrar a la gara	Orar araté de sareda dl vers dla gara	Orar de redaurida al transiament
SS244	La Ila zenter	4.45	4.45	7.00
SS244	La Ila-Reba	5.45	6.00	7.15
SS48	Reba-Jouf de Pordoi	6.15	6.30	8.30
SS48	Jouf de Pordoi – bourcia SS242	6.45	7.00	9.00
SS242	bourcia SS48 – Plan de Gralba (bourcia Ss243)	6.55	7.10	10.00
SS243	Plan de Gralba (bourcia. SS242) –Jouf de Frera	7.15	7.30	10.35
SS243	Jouf de Frera – Corvara	7.30	7.45	10.50
SS244	Corvara - Reba	7.40	7.55	11.15
SS48	Reba – Cernadoi	8.05	8.20	11.35
SS638	Cernadoi – Selva de Ciadoura	8.20	8.35	11.50
SS638	Selva – Jouf de Giau-Pocol	8.40	8.55	12.25
SS48	Pocol – Jouf de Fauzares	9.25	9.40	13.10
SS48	Cernadoi – Jouf de Fauzares	8.20	8.35	12.05
SP32	Jouf de Fauzares – Arparora	9.00	9.15	14.10
SP32	Arparora – La Ila	9.00	9.15	14.10
SS244	Corvara – La Ila	9.15	9.30	14.30