L Statut nuef d’autonomia, sen ence ti idioms gherdeina y badiot
L assessour Mussner y la provinzia da Bulsan met sen tla pratica la esclujion dl Ladin Standard con l'edizion de does verscions dl Statut de autonomia -Ti ultims agn fòvel gnú publiché does edizions tl Standard
L assessour Mussner, la provinzia de Bulsan y l Istitut Ladin met sen tla pratica la esclujion dl Ladin Standard da l'ofizialité en basa a la deliberazion n. 210 di 27 de jené 2003. Na deliberazion sostegnuda con n arat positif dl Istitut Cultural Ladin Micurá de Rü che ti à dé a chesta maniera n bel sclaf al projet SPELL che el enstes sostegniva, do l mote per paruda, ma nia per convinzion. Willeit Carlo ova, te sia enciaria desche vize-president dla Region enlaouta, lascé stampé does verscions dl medem statut tl ladin standard, la pruma dl 1996 y la seconda dl 2002. N segn cler che an ne vuel nia reconesce n laour costoul fat, ma l ascone via l plu debota che ala va, sceben che an les à tout desche basa y che mudé se múdel ben dret puech.
Con chestes traduzions dl Statut de Autonomia, enjignedes ca dal Ofize per Chestions linguistiches dla Provinzia de Bulsan, végnel apliché na norma d’atuazion dl Statut y plu avisa l decret legislatif n. 262, di 22 de mei 2001. Chest decret scriv dant che la Provinzia de Bulsan y la Region Trentino-Südtirol é obliedes de publiché ence tl lingaz ladin en valgunes desposizions de lege y zircolares che reverda dantaldut la popolazion ladina aciaseda tla Provinzia de Bulsan. La deliberazion dla Jonta provinziala n. 210 di 27 de jené 2003 spezificheia spo "cie ladin": tesć legislatifs y aministratifs vegn traslatés tl idiom badiot y tl idiom gherdeina o can t'un y can tl auter, sclujan fora da l'adoranza ofiziala n ladin standard tla provinzia de Bulsan.
L Statut nuef d’Autonomia é gnù metú ju tl gherdeina da la dr.a Ingrid Runggaldier Moroder en colaborazion con la dr.a Barbara Perathoner y tl idiom dla Val Badia da la dr.a Ulrike Vittur. L’Ofize per chestions linguistiches dla Provinzia de Bulsan à sourantout dal 1997 encà la enciaria de fé traduzions de tesc´ giuridics y aministratifs tl ladin de Gherdeina y da aost dl 2003 ence tl ladin dla Val Badia. Pro l servisc de chest ofize tl ciamp dl ladin aud ence la consulenza linguistica y l’elaborazion de na banca dac de terminologia aministrativa y giuridica, tres tl idiom badiot y gherdeina. Un di fins é souraprò chel de renforzé la colaborazion con les autres istituzions ladines. Trames les publicazions vegn dedes fora da l Ofize stampa dla Provinzia. Endut nen él gnù stampé 6600 copies, da giaté debant a Bulsan, tl Palaz provinzial I, streda Crispi 3 (fax 0471 412220/21).
