benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

I ultims Convegns: poscibeltés dl Ladin y lingaz de mendranza pro manifestazions
scrit ai 28 June 2004 da les 15:56:17 da noeles

Politica

 

La Ladinia dess se vistí con sie guant ladin, sie lingaz

Tl turism: an miena de messei mete dlonch tofles todesces y talianes: l ejempl di Grijons dij che ala pò ence ester autramenter, miec - La Ladinia, la tera di creps sclauris, se ascon tres ciamò demassa tla ombria dles provinzies de Bulsan, Belun y Trent, condut che ala á n gran potenzial economich da valorisé deberieda


Cie reazion onse pa nos, sce i jon sun les costes dla Croazia o envalgó d'auter y i vedon dlonch scrites per todesch o talian o "Hier spricht man Deutsch", menus scric te n grum de lingac, tipics de trueps luesc turistics, dantaldut ju de moda: n pue l spiso y istintivamenter méten averda de ne se giaté nia na bela engianeda. La medema situazion y l medem problem onse tles valedes ladines, oláche an miena ciamò tres de ester "in", metan scrites todesces y talianes che ne á a desvalivanza de scrites per ladin degun valour turistich en plu. Nia endlonch ne se astílen enscí.  Foto touta dal sit dl Superski Dolomiti: demé fé reclam con n bel motif pauril é massa puech.


Les relazions dl Convegn "Les poscibeltés dl ladin" y l seminar "lingac de mendranza pro manifestazions" dla FUEN a La Ila audissa da vegnì metudes adum te n manual per i operadours turistics a na moda che la semenza ne tome nia sun terac sterp, ma che valch jerf meine ence valch flour y frut tl davegnì. 
Un n alié à les Unions dessegur tl president dla Maratona dles Dolomites, Michil Costa, che dá prò che al pò gnì fat deplù, che i son portadours de na arpejon culturala-linguistica pluri-seculara che aud da gní defenuda. Ala ne dess nia vegní stopeda via per gauja dl turism desche n cium, ma ester l guant da vigni dí tles valedes ladines. Per n turist él cotant plu interessant vedei valch da nuef.  
Trami i convegns á endò condut a lum n grumon de bones idees vedles y nueves che al paiassa l mueia de vegní realisedes. Jon a vedei n pue plu damprò la situazion aldidancuei, p.ej. tla Val Badia, dessegur la valeda plu "ladina" de chest vers y l plu propi l'Alta Badia: ence per un da foradecá él atira da reconesce che valch se muda do Peraforada. Al vegn scrit sun tofles publiches cotant per ladin, nia demé da istituzions publiches, ma ence da privac. Trueps artejans á metú sun si fabricac y sun si auti scrites per ladin, ence valch boteiga porta inoms ladins: furnaria, tiesciaria y e.i. Sun les chertes turistiches végnel adoré plu o manco i toponims ladins y les tofles per trois y semenes da mont é tamben per ladin. Ma dorata fóssel cotant deplú desponibelté, sce la jent essa n pont de referiment, na sburla en plu.Tla Svizra ladina án metú man ti agn '70 les azions "La fatscha da noss vitgs", tan che "La cialdaura/l mus de nosc paijes". L fin fova chel de mostré ence deforavia che al se trata de n paisc ladin-rumanc y nia todesch. Dutes les tofles publiches: da la architeda dl bus a la tofla per parché, da les tofles dles banches a les tofles comerziales y turistiches é gnudes ladinisedes. Sce al fova valch problem da entene, deida eventualmenter l lingaz di segns conescius soura dut l mond. Per ester plu concret: a Scuol tla Engiadina bassa ne stal p.ej. inió scrit "Hallenbad / Piscina", ma demé "Bogn cuerná" per Nodadoia con n segn internazional dlongia, al ne sta inió scrit "Naturparkhaus", ma "Chasa dal Parch Naziunal"  y e.i. Chi che á fat na roda te paisc rumanc dla Svizra veid con marevueia che trueps albercs á les indicazions demé per rumanc (la cherta dl menu, salf da mangé, restorant, chidlara ... valch iade con segns davejin). Te n complés turistich a Flem clamé "Vitget alpin" (pice paisc alpin) án metú dlonch - do n plan - demé tofles per rumanc. Do l mote ne á degugn problems empera y al plej. Dut adum ti á dé chestes mesures de carater linguistich ai luesc de turism na paruda plu atrativa y inzaridenta per persones da foradecá a l'archirida de valch da nuef. La chestion messessa vegní studieda avisa con cie mesures che na tel "ladinisazion" pò vegní arjonta, tiran ite assoziazions y istituzions: i comuns essa de chest vers bendebot de forza, podan scrive dant obligatoricamenter che les tofles á da ester dantfora per ladin, sce ales vegn tachedes fora al publich desche suzed p.ej. tla Catalugna tl cheder dles mesures de normalisazion linguistica. 
Generalmenter pò dutes les indicazions tles valedes ladines, sclut ite cheles turistiches, avei dagnora dantfora la dizion ladina, con eventualmenter basvia te na scritura meindra per todesch y talian. I inoms di implanc portamont tl raion dl Superski Dolomiti podessa dagnora porté indicazions ladines: sentadoia da La Crusc (empede seggiovia Santa Croce), furnadoia de Piz La Ila, implant portamont de Dantercepies y e.i. La Ladinia dess ence giaté na forma: desche al é vegnú metú su tofles per saludé i turisç dant i paisc, podéssen ence mete su a l'entreda dles valedes ladines la tofla "Benvegnus tla Ladinia"  (enfin a sen veiden demé: Willkommen in Südtirol/Benvenuti in Alto Adige), na proposta che la Union di Ladins Val Badia ova bele fat dant da agn. Samben fóssel damí sce les tofles che indicheia plazes da parché, implanc portamont de coliament soura les valedes, architedes dl bus y e.i. fossa soura duta la Ladinia (Ampez, Badia, Gherdeina, Fodom, Fascia) unfat, vuel dí scrites te n ladin scrit standard. De chest vers án abú mancia a La Ila n referiment. L assessour Mussner s'á tant festidié de arferé l Ladin Standard y se limiteia ence al Convegn de dí demé les paroles de gaujion. Al damana do propostes d'utl per sies ativités: al fossa da se aodé che al responessa n iade con valch argoment a la domanda ciuldí che la maioranza che se dá ju con la materia se ghira n standard ladin scrit y ciuldí che el, desche assessour, á laoré decontra ti tolan l'ofizialité? Paroles de ocajion é samben dagnora plu saurides.

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Ladin Standard

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: I ultims Convegns: poscibeltés dl Ladin y lingaz de mendranza pro manifetazions (ponc: 1)
da giatfosch ai 28 June 2004 da les 19:14:56
(Infos sun l utilisadour | Ti mané n messaje privat)
ci ón pa s'aspeté da jent che à mâ imparé da lascé jö la braia a dert'ora?



Re: I ultims Convegns: poscibeltés dl Ladin y lingaz de mendranza pro manifetazions (ponc: 1)
da travers ai 29 June 2004 da les 09:42:04
(Infos sun l utilisadour | Ti mané n messaje privat)
L assessour Mussner y i autri fanc dla SVP "ladina" à n argoment sterch ma che an ne pò nia dì fora, ciuldì che nia politically correct: Deutsch über alles.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.367 seconc