Ladin Standard: Comunanza Ladina a Bulsan dantfora
Curs de LS sclut ju a Bulsan - La Comunanza se aoda che tres de plu persones, ence a livel politich veide ite la nezessité y ti dae l sostegn
Do che l curs de ladin standard metù a jì da la Comunanza ladina a Bulsan adum con la Union Generela é ruvé, podonse cialé endò a chel che é vegnù fat y che i partezipanc á podù emparé y fé n valgunes reflescions. Endut àl tout pert 9 persones, ladines y nia ladines. Dilan a la competenza dla maestra Nadia Chiocchetti él sté meso ruvé ite tles carateristiches plu significatives dl lingaz pian via da la fonetica y da la formazion dles paroles enfin a la morfologia y a la sintassa. Dret interessantes é stedes les paridledes anter i singui idioms dles valedes ladines, olà che al é desferenzies y somianzes tla pronunzia y tla sintassa. Enscì él sté meso conesce miec ence les autres variantes. Una na lezion con intervistes y ejempli pratics é vegnuda touta su da Anna Mazzel dla Radio ladina.
Enzacotant de partezipanc al curs de Ladin Standard a Bulsan.
L fin de chest curs é sté chel de promueve l LS per podei l nuzé ti media y con les istituzions publiches, dantaldut ti contac che va sourafora les valedes y i comuns singui. Te chest sens à la Comunanza ladina desmostré de cialé inant y de ester a l’avangardia anter les federazions culturales ladines per chel che reverda la difujion dl LS.
Per l davegnì nes dejidronse che tres de plu persones veide ite la nezescité de n lingaz unifiché dantaldut a livel politich olà che datrai ne ciàpel ciamò nia la dreta creta. An cogn conscidré che ence i „neoladins“ tla Provinzia de Belun é do a laoré fora n idiom standard y per chest ciapa n sostegn politich dl LS (Ladin dolomitan) ciamò plu relevanza. Sce al garata arà enultima chi da lajù a desposizion n meso de coejion y de agregazion truep plu sterch tratant che i ladins dles Dolomites pesimeia y se spidicia su tres de plu.
La Comunanza se lascia ite a porté inant chest propojit y a pité ence per l davegnì de autri cursc de LS.
N dret bel dilan ti va a la fin a Nadia Chiocchetti y a la Union Generela.
Dr. Ivan Lezuo
President dla Comunanza ladina a Bulsan
