"Ladins: campions da se dé la sapa sun i piesc"
Les oujes ladines spedicedes su che ales ne ti uega a degugn empede unides
Pici, despartis anter ei y te d'ei enstesc. Chesta é la fotografia che vegn fora di ladins do les lites di 12 y 13 de jugn. Sce an analiseia l resultat tles valedes ladines veiden gonot che la ousc ti é vegnuda deda a candidac scialdi dalonc dai ladins o che conesc puech i problems de chesta popolazion y che podessa ence porté a livel european sia ousc. L caje de oujes dedes per efet mediatich, che vuel dì endrezedes a candidac che dantvia ne s'à nia fat conesce y apriejé tla politica, ma per merit dla televijion. Per ne descore nia de cheles oujes dedes a chi candidac che ne ciafiará mai da se senté tl Parlament Europeich, percie che ai á bele ados na enciaria politica nazionala nia compatibla. Al é l caje dl President dl Consei di Ministri Berlusconi. El meso che i ladins se feje tré da la “sirena” de chisc inoms che à demé l efet de tré oujes desche i leresc les sita y ai ne se conzentreia depierpul nia sun cheles persones damprò a d'ei, sibe dal pont de veduda teritorial che etnich?
La despartizion teritoriala peisa dassen y chel negativamenter.
Spo auden da conscidré ciamò n auter element sostanzial che à caraterisé chestes lites. La jent à adoré puech en general la ousc de preferenza, ma ala s’à fat tré dal simbul dl partí. Y desche tl rest d’Italia y d’Europa, la “simpatia” s’à trat da la pert de cheles formazions a l'oposizion. Na protesta contra i governs nazionai y sia politica che con euro y vera tl Irak, à slesiré l tacuin dla jent. Spo l fat che Detomas, soul candidat ladin a duc i efec, che se prejentova con la lista Uniti nell’Ulivo, sie resté a ciasa, o miec a Roma, é na gran ocajion perduda per duc i ladins. Na picera consciderazion a pert pòn fè per Fodom y en particolar per les lites provinziales, olàche la Lega é endò chersciuda y tourneda soura l 10%. Oujes dedes dessegur ciamò per chel miraje de autonomia perdiché da agn da Bossi & Co. Da desplajei che ciamò ne àn nia capì che chesta autonomia ne ruvarà mai tl pice de na mendranza desche i ladins. Al cleca vedei cie che al à declaré l candidat dla Lega tla provinzia de Belun. Dant les lites fòvel per ti conzede spezifizité ai trei comuns. Can che al é sté ora de baraté sciadrees con doi candidac che va al balotaje, àl bele dit che l’autonomia messarà ester per duc unfat.
Lorenzo Soratroi
