benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Seminar a La Ila: l lingaz ladin y sia proiezion devers foradecá
scrit ai 18 June 2004 da les 12:39:49 da noeles

Cultura

 

An mess fé l prum vare y avei l coraje

I operadours turistics ladins fossa desponus a ti dé plu lerch al ladin pro manifestazions desche la Copa dl Mond y la Maratona dles Dolomites

(g.m.) Sun scomenciadiva dla UGLD végnel tegnì chisc dis (dai 16 ai 18 de jugn) tla Ladinia n convegn internazional per les mendranzes zenza „Kin-State“ (stat-pertegnuda). Sot al moto „Proiezion dl lingaz minoritar fora tl mond“ él prevedú de plu relazions y meises torones con l fin de ejaminé chestions y aspec relatifs a l'adoranza dl lingaz de mendranza. L seminar à metù man enier da doman tla Ciasa dla Cultura a La Ila, olache de plu personalités dl mond politich y aministratif à portè ai ghesc' l salut de benodù.

Foto: Michil Costa, president dla Maratona dles Dolomites y ostier dl Hotel La Perla a Corvara desmostra sensibelté y vuel mudé colour. Ladins dagnora dut embacolés via ti colours blanch y cuecen de "Südtirol", zenza n minim de sia sia identité nience pro manifestazions de livel? I colours ladins vert-blanch-blé veiden tres plu d'inrer.



Dantmesdí àn podù audì de plu relazions sun l'emportanza da adoré l lingaz de mendranza en ocajion de de gran manifestazions sportives desche p.ej. maratones, gares de schi, campionac mondiai, Olimpiades y e.i. sce chestes vegn metudes a jì te raions de mendranza. N gran interès a descedé l referat de Chasper Pult (President da n iade dla „Lia Rumantscha“ y ex- manager dla „Pro Helvetia“ . Pult à portè dant desche l ladin rumanc é vegnú adoré en ocajion di campionac mondiai de schi alpin en l ann passé a San Murezzan/St. Moritz tl’Engiadina Auta y olache al é vegnù tralascé da i dé chela lerch che al ti essa perdret aspeté. Ines Cavalcanti (raprejentanta dl’Assoziazion „Chambra d’Oc“) à rejoné sun les bries che an fej bele da plu temp per che l lingaz ozitan giate na picia lerch ofiziala en ocajion di Juesc Olimpics da d’invern tl 2006 a Turin.

L jornalist Gernot Mussner à rejoné sun l tema „multilinguism y l ladin pro manifestazions culturales y sportives tl raion dolomitich“, sotlinian  che la prejenza dl ladin é – anfat de cie manifestazion che ala se trata – indispensabla. An dess avei l coraje da adoré pro vigni gaujion ence l terz lingaz de nosta provinzia: l ladin.
Interessanta é spo ence steda la meisa torona componuda da chisc reladours: Erwin Frenes, jornalist dla RAI, Michil Costa, ostier y president dla Maratona dles Dolomites, Christof Engl, diretour dla SMG, Gerhard Vanzi, diretour dl marketing dl Superski Dolomiti, y Nigel Hicks tla cualité de raprejentant dla FUEN.
Da la discuscion che é ence steda carateriseda da trueps aspec critics, él sautè fora te na maniera unisona che l lingaz de mendranza merita plu respet y che i operadours turistics y economics ne dess nia bazilé o se daudé da adoré te sies campagnes de promozion ence l lingaz dl'oma. De plu operadours à mostré sensibelté y desposizion tl davegnì per chesta ghiranza. An vedarà spo sce al suzed ence tl concret valch.
Domesdí à i enviés dles nazions ruvedes adalerch: Frisons, Furlans, Cornvalisians, Ozitans, Aromuns y e.i., vijité l Istitut ladin a San Martin y l Museum Ladin y dedò ài fat na vijita a les viles y a la Val di Morins a Lungiarü, sclujan ju l di con na ceina ladina  encornijeda musicalmenter  da cianties ladines portedes dant da Alexander d’Al Plan y compagns.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Seminar a La Ila: l lingaz ladin y sia proiezion devers foradecá (ponc: 1)
da travers ai 18 June 2004 da les 16:21:46
(Infos sun l utilisadour | Ti mané n messaje privat)
I ostis fej samben siei conc y ciala al profit ma i rate empò che an poe avei plu creta tles forzes vives dl'economia che ti raprejentanc "ladins" dla politica. I prums é manco adorbés da l'ideologia "sudtiroleisa" che nostes autorités culturales locales y a Bulsan.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.380 seconc