benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lungiarü: esposizion d'ert a Seres y Miscí
scrit ai 11 June 2004 da les 07:19:33 da noeles

Cultura

 

"Chirian l'armonia perduda"

Viles de Seres y Miscí desche cheder -  l'esposizion d'ert alalergia romagnará daverta enchin a la fin de aost

Les viles de Seres y de Miscí ta Lungiarü fajará da cheder a na esposizion alalergia n pue particolara. En sabeda, ai 17 de messel, da les 16.00 vegnirál daurí ofizialmenter tla picera plaza amesa la vila de Seres na mostra de composizions dl artist Friedrich Sebastian Bacher da Luttach a chela che an ti á dé l inom "Chirian l'armonia perduda". Les composizions dl artist puster ne gnirá nia arconcedes sun parei, ma metudes su alalergia anter les ciases y les majons, dlongia i fourns da pan y ti trevesc anter y encer les does viles. La flour de na viola.



L'esposizion vegn endrezeda via dal Consei de Formazion dl comun de San Martin deberieda a l'Assoziazion turistica che vuel varenté con chestes iniziatives les viles dla Val Badia, fé conesce chesta bela arpejon y tl medem temp porté pro a sie mantegniment. Nia demé fulestiers, ma ence jent dl post fotografeia gen les viles: d'isté canche i solés é plens de ciofs, da d'auton canche ales é ponudes ite te milesc colours, i paurs entratant che ai laora y e.i. An dess endere se tegní tresfora adiment con cie fadies che la contreda - a chela che an ti ciala aldidancuei con gran plajei - é vegnuda runceda per enjigné ca ciamps y pres y rencoreda con truep soious tres trueps secui enfin aldidancuei. Depierpul che autró ti paisc dla Val Badia créscel su ciases y fabricac nuefs desche fongons - n frabiché n pue salvar - n'é chest, per fertuna, nia suzedú enfin a sen tles viles che mantegn inant n cheder de gran armonia y belté. Ales é n pue l "cuer ladin" dla valeda, sternudes fora desche perles sun les temples soredlives, desman da les fueres turistiches. Ma ence chilò métel man da bandolé aluesc l vedl sistem de vita y de laour sot la prescion dla razionalisazion. Les taveles (les campagnes entourn i paisc y les viles) vegn dutaorela siedes y laoredes con festide y al cresc la coscienza che al paia la mueia de rencoré chisc biei luesc, ence sce economicamenter ne enrédei nia tant, y daldaldut de mantegní l'architetura tles viles te n cheder armonious. La mostra romagn daverta entratant dut l meis de messel y de aost. Entratant chisc meisc vegnirál ence fat en valgunes escurscions videdes (informazions pro l'Assoziazion turistica). Desche dit dantfora vegn l'esposizion daurida ofizialmenter en sabeda, ai 17 de messel, da les 16.00 tla picera plaza amesa la vila de Seres con paroles de salut dl assessour a la cultura dl Comun de San Martin, Giovanni Mischí. Karl Nicolussi-Leck, president onorar dl Museion de Bulsan rejonará en curt sun l tema HOMO SOLARIS. Spo sarál n espert che spliará en curt ciugn che é i liams anter chesta esposizion alalergia y la strutura dles viles.

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.380 seconc