25 agn "I Ladins tla stampa"
Vigni ann na mapa: I articui clupés adum da truepes publicazions da Lois Trebo cuer sen passa 25 agn - i prums va inaò ai agn '60 - Les mapes penjes de informazion deventará na fontana enredoula per scrive la storia
Una dles publicazions anuales dret apriejedes tla Ladinia, dandaldut da jent che laora tl ciamp dla publizistica, é la mapa "I Ladins tla stampa" metuda adum con truepes bries dal dr. Lois Trebo y deda fora da l'Union Maestri Ladins. La edizion 2003 contegn endò n sclafon de articui, bonamenter damprò da 10.000, partis ite cronologicamenter do meis y sourantouc da desvalives publicazions ladines, talianes y todesces dl raion, sclut ite i Grijons y l Friul. Ence n centené de articui de noeles.net á giaté lerch laite. La cerna di articui é gnuda fata da Lois Trebo y reverda dantaldut i svilups politics y les tematiches cultura, lingaz y storia, dantfora ladin-dolomitans, ma tamben con odleda devers i Grijons y l Friul. L cuertl dla mapa 2003.
Les mapes é da giaté te dutes les biblioteches dles valedes ladines, tla biblioteca Tessmann a Bulsan y ence te chela da Bornech. Na letura plajoula sun coche la chestion ladina se brodola inant da ann a ann con truepes chestions che resta dutaorela davertes desche Lois Trebo splieia tl pream a l'ultima edizion. A d'el ti vál dret n bel dilan per chest laour fondamental.
