benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Mendranzes: I Cornvalisians, na mendranza che nasc danuef
scrit ai 10 June 2004 da les 17:10:46 da noeles

Cultura

 

L bel ejempl di Cornvalisians

L lingaz celt cornvalisian fova mort fora entourn l 1700, encuei cióscel a vita nueva - L Govern dl Cornwall meina do y n grum de organisazions privates sostegn chest "revival"

En gaujion dla "Enconteda dles nazions europeiches zenza stat", ai 17 y 18 de jugn 2004 a La Ila, sarál ence a la pert na delegazion di Celtesc dla Cornovalia/Cornwall. L caje di Cornvalisians é dret particolar, davia che al se trata de na mendranza nasciuda "da nuef" tl secul passé.  Ai temps dla "Rebelion contra l liber da messa" dl 1549 rejonova y entenova ciamò la maioranza dla jent tla Cornovalia, la peninsula sudozidentala tla Inghiltera, cornvalisian, n lingaz celtich. La rebelion populara fova na reazion contra le Act of Uniformity (legia de uniformazion). L govern britan volova impone a ries l lingaz engleis ence te gliejia y entratant la rebelion fòvel na gauja de vita o de mort. Trueps cornvalisians s'á paré contra la introduzion de n liber de orazions demé engleis tres l'armeda reala. I caps é vegnus sarés via y esecutés y la jent á messú patí truepes represalies. Encer le 1600 fova l lingaz celt cornvalisian bele dassen metú a cianton y la situazion s'á pioré ti centenés do. La liejenda conta che l'ultima persona che á rejoné celt dla Cornovalia fova na certa Dolly Pentreath che fova morta dl 1777, ma zacai arata che l lingaz se ae bele destudé via dl 1676 tl paisc de Gwithian. Al lim dl 1800 ne rejonova plu degugn chest lingaz.  "Learn Cornish", l lingaz celt cornvalisian vegn descurí y al se remet ti ultims agn.



Lingac celtics gniva rejonés n iade te de gran raions europeans, aldidancuei romágnei limités ai raions portés ite a scur-vert tl'Europa Ozidentala y tla Bretagna tla Francia. La Cornovalia é l piz junsom l'Inghiltera devers ozident.

An l'aratova mort fora. Encandenò á en valgugnes persones metú man da l emparé danuef: dl 1875 podòven cumpedé i prums 6 rejonadours. Tl 20eisem secul s'ál svilupé n moviment clamé "revival". L lingaz fova ben documenté sibe con dizionars che con leteratura che ova florí na curta sajon entratant i temps dla reformazion religiousa. La fondamenta linguistica fova perchel dantman. L laour insfadiabel di linguisc' Henry Jenner y Robert Morton, linguisc'  che á spenú truepes bries per adaté l cornvalisian ai temps moderns tl secul passé é resulté enultima frutoul.  Aldidancuei aráten che al sie entamo encer 3,500 rejonadours de celt sternus n pue soura duta la peninsula de Cornwall y trueps sostegnidours con gres desvalifs de conescenza dl lingaz. En valgugn joegn é enfinamai vegnus trac su con chest lingaz endò. L lingaz cornvalisian liejen y veiden dutaorela, desche l Ladin-Retoroman tla Val Venuost te Südtirol (peratuer mort fora entourn l 1800, ma vivent tla Val Müstair), te cotant de toponims y conesce l lingaz deida samben capí damiec la tera y sia storia. L govern raional dla Cornovalia, le "Cornwall County Council" (Dynnargh dhe wiasva Konsel Kernow), promuev ti ultims agn con desvalives mesures na politica de sostegn al lingaz celt-cornvalisian. Al á entratant damané y giaté l reconesciment desche lingaz de mendranza Europeica y tamben da pert dl stat engleis. Ti ultims diejens pòn enscí constaté n cert  "revive" con publicazions de periodics redazionés demé tl lingaz cornvalisian desche "An Gannas", "An Gowser" y "An Garrick". Les stazions "Radio Cornwall" y "Radio Pirate" trasmet regolarmenter per cornvalisian. Ence foliec locai desche l "Western Morning News" publicheia regolarmenter articui tl lingaz cornvalisian. L moviment linguistich vegn finanzié da truepes fondazions privates y ence da les gliejies che prejenteia tres plu gonot sies noveles sibe per engleis co per cornvalisian. L'adoranza dl lingaz s'á deslargé cotant tla populazion ti ultims agn tant inant che la "Kesva an Taves Kernewek", l Istitut de promozion dl lingaz, se fej ert da ti sté do a dutes les domandes. Samben tegn aldidancuei i Cornvalisians - do avei arjont l reconesciment desche popul celt -  n contat bendebot strent con si vejins celtesc: con i Walisians tl Wales, con i Gaelics tla Scozia y tl'Irlanda, con i Celtesc sun l'Isola de Manx y con i Bretons tla Francia. Bele da en valgunes diejenes de agn tol pert grups cornvalisians ai Juesc Celtics y a dutes les autres encontedes interceltiches dla "Celtic League", la Lia Celtica.

Noeles on-line per Cornish/cornvalisian:

http://www.geocities.com/cornishnews/

http://www.agantavas.org.uk/

 

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.455 seconc