benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Dai Retics ai Ladins
scrit ai 06 June 2004 da les 20:34:58 da noeles

Storia

 

Les raijes retiches di Ladins

Con gran mueia di archeologs ne ésen nia datant de dezifré les iscrizions retiches che podessa porté n pue de lum  

Chi fova pa i Rec che an rata desche i avons di ladins y che vivova tles Alpes Zentrales, do l mote sie decá che delá dla morona prinzipala dles Alpes, ma con conzentrazion particolara tla region Trentin-Adesc Aut-Tirol-Grijon. Fòvel na unité o demé na denominazion coletiva che i Romans ti à dé? Fòvei veramenter emparentés con i Etruscs dla Toscana desche n valgunes fusties linguistiches podessa nes fé raté y istoriografs romans da enlaouta scriv? N grum de domandes, n cogol de ipoteses, ma pueces brances concretes enfin aldidancuei. La reziologia, nasciuda dant da 150 agn per ti jí do a chest mister, se fej ciamò plu ert che l'etruscologia a d'avei na vijion ence demé tourbla dla sozieté, dla cultura y dl lingaz retich tles Alpes te chi temps tant desman. Na scritura retica dal Renon.  An po la lieje clermenter da manciancia a mandreta!:  "laseke / maze'e", baudi ne sán nia cie che al vuel dí.



Do rata rers é i ciafs, anter chisc n valgunes iscrizions sun peres, sun massaries de bron y  de fer y sun corns y chel tl alfabet etrusch, n fat che desmostra i liams che la jent dles Alpes ova a chi temps, dal 6.-5. secul dant C. inant, con i Etruscs dla Toscana, cotant plu progredis culturalmenter. Iscrizions tl alfabet etrusch án giaté n pue dlonch tles Alpes Zentrales  tl'Engiadina, tla Val de Non, tla Val dl Adesc, tl Venuost, a San Laurenz te Puster y e.i., cie che desmostra tamben che al fova na certa unité. Enceben che an é datant da lieje les iscrizions romagn sie significat endere dutaorela tl asconù, davia che l lingaz ne pèr emparenté con degun auter lingaz che podessa daidé pro la dezifrazion. Bonamenter fòvel n lingaz pre-indoeuropeich, desche l basch. N valgunes paroles y aspec culturai retics viv inant desche arpejon ti Ladins. Al ne é nia meso da capì definitivamenter, sce i Retesc fova na confederazion de popui de natura cultura y/o politica, o na comunité de lingaz, cultura y religion plu o manco valiva. Per respone a chestes domandes ciáfien demé da avei indicazions tres studes linguistics y da l'archeologia. Provon da encadré n pue la situazion tl temp:

tla Eté dl fer (dal ann 1000 enfin al ann 15 dant C.) fova nost raion caraterisé da na cultura che vegn definida alpina-zentrala che ova bele metú man tla eta dl bron, clameda cultura de Laugen/Mellaun. An partesc ite l temp pre-istorich per nosta region alangrovia te 3 fases:

1. n temp plu vedl enfin al ann 900 dant C. definí con la "Cultura de Laugen" (l inom vegn da n lech ensabloné soura Persenon, frazion de Naz-Schabs, oláche an á giaté trueps ciafs archeologics). Te chesta fasa végnel ence encadré l aciasament dl temp de bron de Sotciastel tla Val Badia (1800-1400 dant C.) che nes confermeia, con na certa segurté, continuité de enridlament tles valedes ladines; la populazion fova "retica";

2. n curt temp intermesan definí "Cultura de Mellaun", clameda do n luech dlongia Persenon (a chi temps n sepolcrei) dal ann 900 al ann 700/600 dant C. con carateristiches dret davejin al temp da denant che an la clama ence Cultura de Laugen/Mellaun.

3. n temp tardif dal ann 600 dant C. enfin a la romanisazion dal 15 dant C. che pò vegní classifiché desche "Retich" y che prejenteia na certa continuité con les fases da dant, ma tamben en valgunes desferenzies y inovazions, enscí comparéscel per l prum iade la scritura. Encer l ann 500 dant C. ruva i Etruscs tla planura Padana y la Val dl Adesc deventa n troi tres plu emportant de marciadament anter nord y sud. Segn cler de chisc contac é la sourantouta dapert di Retesc dl alfabet etrusch, che i Etruscs ova enstesc sourantout dai Grecs. Te chest temp él da recordé dandaldut i aciasamenc retics de Dos dai Pigui te Fascia y de  Col de Flam te Gherdeina. A Col Santa Lizia ta Fodom sot al Mont Poure án giaté na iscrizion tl alfabet nordestrusch.

Tl prum temp enfin al ann 900 se delada la cultura de Laugen bendebot tl ciadin dl flum Adesc, ruvan enfin tl'Engiadina tl ovest, a les spones dl Rain tl nord y viafora enfin a Villach tl est. An pò perchel ipotisé che al sie sté valgamia de moviment de populazions, plu avisa de grups sudalpins che passova tres la Val dl Adesc soura l jouf dl Brenner, tres l Venuost y  l pas dal Raisc y tres Puster per ruvé te teres plu dalonc a nord, oláche la prejenza dla cultura de Laugen se sraresc spo damprovia, conferman che l zenter de radiazion fova a sud. Tl temp intermesan, vuel dí chel dla cultura de Mellaun, ciáfien da recostruí dai ciafs archeologics che i aciasamenc tles valedes te nost raion deventa tres plu spesc, nia demé tles valedes prinzipales, ma ence sun les autures, bonamenter dilan al comerz tres plu busient y enredoul. Al sauta a uedl, tres l'analisa di ciafs archeologics (forma dla ceramica, sepolcreis), che i liams con les zones a sud, vuel dí con l teritore dla cultura veneta de Este y con chela emiliana de Villanova y estrusca, fova dantman. Tl temp tardif, clamé "Retich", se desleriel la cultura "Fritzens-Sanzeno" (Fritzens é na localité tla Val dl Inn/Tirol dl Nord, Sanzeno na localité tla Val de Non) te dut l raion dl Tirol, Engiadina, arjonjan ence les Prealpes devers la planura padana. Te chest teritore vível cheles populazions che i Romans clamará Retesc. Y i Retesc é la pruma populazion de chela che al ne é nia demé ruvé enchin a nos spidic archeologics, ma ence n zacotant de fontanes scrites: storics, geografs y poec grecs y romans rejona de d'ei, desche p.ej. Titus Livius. Raetia Prima y Raetia Secunda sarà ence l inom dles does provinzies romanes (Raetia I y Raetia II), donca indicazions che i Retesc vegniva conscidrés da foradecá desche na unité de lingaz y de cultura.

I Retesc fova fascinés dai Etruscs (foto: l conesciú sarcofagh novicé etrusch), da d'ei ái sourantout l alfabet. Influenzes linguistiches é atestedes sun iscrizions retiches.

Tl 5. y tl 4. secul dant C. stramuda les invajions celtiches di Gai da la Francia ca la composizion etnica tla planura Padana, ma i raions retics de nosta region ne vegn nia tochés, a pert la Val de Puster y poester na pert dla Val dl Isarch da tribus celtiches dl Noricum. Entratant splundra a porta da sud la potenza imperiala romana che culmineia con la deventa dl teritore retich tl ann 15 dant C. da pert de Drusus, fi de legn dl imperadour Otavian Augustus. Da chest moment se destuda via la cultura retica "Fritzens-Sanzeno" a pert valch picera floridura tardiva te luesc desman. Al scomencia la romanisazion y al nasc la etnia retica-ladina, la portadessa plu vedla de chesta arpejon retica.

Segur él n iade che i Retics ne fova nia Celtesc, davia che l lingaz celt é conesciú y perauter dutaurela vivent aluesc tl'Europa ozidentala. L ladin, desche bele l inom dij, é n lingaz essenzialmenter latin y s'á svilupé dal ladin vulgar, ma al contegn dutaorela n valgunes paroles preromanes (endie nia demé l ladin, ma ence les rejonedes entournvia) che an rata retiches.

N valgunes paroles de derivanza retica (?)  tl ladin:

crepa/crep

Berg/Felsen

roccia/monte

barantl

Legföre

pino mugo

brama

Rahm

panna

ciaspes

Schneereifen

racchetta

cìer

Zirbelkiefer

cembro

dascia

Fichtenzweig

ramo di abete

dlasena

Schwarbeere

mirtillo nero

luesa

Rodel

slitta

morona

Kette

catena

nida

Molke

siero del burro

roa

Mure

frana

sala

Rinnsal

rigagnolo

dal sit www.vejin.com.

Les fusties retiches ne encónten nia demé tl lingaz, ma ence tl'architetura ladina, i recordon les támores/tambres retiches da cheles che al se á svilupé la vedla tipica "ciasa ladina".

avon = antenat (da besavon)

Les iscrizions retiches che an conesc aldidancuei vegn reportedes per entier sun chest sit:

http://members.tripod.com/adolfozavaroni/retiche.htm

Bendebot trueps detais sun la chestion di Retics contegn ence l sit:

http://www.jfp.ch/inhalt/bw/infos/raeti/raeter_inhalt.htm


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 4
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Cultura

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.432 seconc