benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites europeiches 2004: lité n ladin per valei deplù
scrit ai 05 June 2004 da les 11:10:04 da noeles

Politica

 

Les lites europeiches, na ocajion per dì "i esistion ence nos!"

Les lites: ne i dé nia la ousc a la Svp fossa n vare inant - Unis nia demé tl pice monument sun l jouf dl Sela, ma dantaldut tla coscienza de vigni ladin

La touta de posizion da pert dla Lista Ladins da lité Bepe Detomas en gaujion dles lites europeiches en domenia che vegn é n segnal che la mendranza ladina dles Dolomites é ciamò viva, che an la giata altamo te valch vedl vocabular, dessegur nia te chel dla politica dla Svp da encuei. L juech y la funzion dles lites é gragn per i ladins che podessa ruvé ite tl parlament europeich.

Do da 80 agn da la tripartizion fascista á i Ladins sen la poscibelté de lité deberieda n sie raprejentant.

 



Ala se trata de na ocajion per mesuré nosta coscienza ladina, la coscienza desche mendranza etnica y nia demé desche abitanc dla Val Badia y de Gherdeina. La Svp ne ruva nia sourafora y ala n'à daldut nia plu na politica, ence sia cultura é demé chela de organisé mostres a livel de scola elementara y scola mesana y de fé bleita empera per i destò da n pensier critich. Al vegn fat de dut per desdruje la coscienza etnica, politica, de mendranza y an coiona demeztroi la jent con la ilujion dl folclor. An ciala pro a n spetacul miserabel. La cossa vegnirà tres piec, sce an ne muda nia sistem, sce an ne cherieia nia coscienza bele ence te scola. Les lites europeanes pò garaté moment de reflescion persoura nosta situazion, na situazion de chi che ne conta nia. El meso che an ne posse nia mude valch! Tres demé rassegnazion! Sce an vuel jì inant a se lascé governé dai autri, spo él cler che la cossa deventarà tres piec, che la mendranza ladina tomarà fora. Encandenò sonse sen dant da na ocajion dret grana, de podei creie te nosta mendranza y de dé na desmostrazion che i volon conté. I ladins de dutes les valedes dolomitanes pò se unì, ciafia da desmostré concretamenter de volei tegnì adum, de se conesce y de fé valch deberieda che ne reverda nia demé l folclor, ma nosta identité, nosta coscienza politica.

Do 80 agn, dal 1923 encà, onse endò la poscibelté concreta de laoré adum, de nes defene deberieda, de mete su deberieda n nost raprejentant che nes raprejenteie diretamenter tl parlament europeich, na ocajion unica, dret grana che pò ester l meteman de na situazion nueva, olà che i inoms: badioc, gherdeines, fascians, fodoms y ampezans ne é nia demé unis te n pice monument sun l jouf dl Sela, ma souradut tla coscienza de vigni ladin.

 

Bepe Detomas é n ladin-fascian, espert de politica y de lege, zenzauter a l'auteza de n tel mandat, na persona che crei tla Ladinia, te n lingaz unifiché, te n sistem scolastich unitar, te na aministrazion coordineda anter dutes les valedes, te n trasport interladin coordiné y e.i. Al fej pert dla lista Uniti nell'Ulivo y al à l numer 8. I recordon che ence la Svp é lieda a la lista Uniti nell'Ulivo, ence sce ala à sie simbul. Michael Ebner, candidat di todesc, é segur de ruvé ite y perchel  ne àl nia debujegn dles oujes di ladins. Al fajarà dessegur n bon laour per i todesc y al lasciarà, desche al é tres suzedù, i ladins al ultim scialin. Dantaldut ne àl nia na vijion interladina de duta la mendranza ladina. Dut al plu conta per el i ladins de Gherdeina y de Badia y ence chisc demé desche mendranza tla mendranza, chela todescia. Ne i dé nia la ousc a Ebner ne é nia n tradiment, ma n vare inant per nes asseguré desche mendranza etnica autonoma plu reconesciment y sconanza. I messon devenje la vedla maniera de pensé demé ai contribuc y a la tema de rapresalies politiches, sce i ne ti don nia la ousc ai todesc. Na maioura coscienza ladina nes fajessa ence stimé deplù dai turisc' y magari propi da chi todesc. Al mess ester na gauja a cie moda che i ladins á tant puecia o deguna coscienza de sé enstesc. Massa puec é i ladin motivés a laoré per crié coscienza, cis tl mond dla scola. La maioura colpa á dessegur l partí de maiornza, la Svp, che scouta via completamenter l problem, trueps se doda enfinamai de vegní conscidrés ladins. Al mancia l conzet de mendranza.  LADINS, nr. 8  Bepe Detomas! (uc).


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.477 seconc