benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Fodom: i abitanc de Vijinè de Là i è restei sarei
scrit ai 02 January 2003 da les 16:16:31 da noeles

Desvalives

 

Dé na mán a chësta ala popolazion che passarà n invièrn coscita difizile - La Union di Ladins abina adum scioldi per daidè

de Lorenzo Soratroi

 

L’Union dei Ladins da Fodom l’à pensé de mëte a ji na scomenciadiva de solidarieté per chi del Vijiné de Là che i é restèi sarèi, davòche le ultime ploie de novembre, le i à porté via la strada.

Se trata de na sotscrizion per trè su n aiut a chële diesc persone che sto invièrn i avarà problems e speise mplù a tignì i colegamenc col rest de la val. Coche duc recordarà, puoch soura Molinat de Retic, n tòch de strada l é sboé jù e defàt i colegamenc col Vijiné de Là i s’à saré per i meśi a motor.



Se ciafieia vèlcamia a passé a pé, ma ence chëst l é scialdi pericolous, o per na strada ntel bòsch da Ornela via. N strent budél de ziment, l é duta la strada restada su, ma da na pèrt e da chël autra, se gioura n gran busc. Difizile e pericolous, coche se dijëva, passé da scur o co la nei. Valgugn ava damané che vegne fat almánco n pico pont da podei passé a pé. Ma l Comune l à dit che chëst sarà difizile podei l fè. L geolog de la Provincia, rué n ispezion auna a chi del Genio Zivil, l à dit che l taren no l é segùr. Podëssa vignì ju ncora 10.000 mc de material. Per chëst degugn vòl se tò la responsabilité de fè n pico pont da podei passé a pé. Ntratánt nta Davedin l é resté cater persone, perloplù jent de temp, che no n à volù sen jì deméz ence se l Comune ava bele pensé a n’evacuazion. Lori i é usèi a sté sarèi d’invièrn. I no se spigoleia: “Demè che reste la salute”, i disc.

Ence chi da Sotinglacia i é restèi. A la Plié no n eva n albièrch e nlouta i é tournèi nte sue cèse.

Via Roncat l’é na fameia jovena, co nen pico tosat de puoc meisc. I é vignus da fòravia, i s’à compré na cèsa e i volëssa fè fòra n agriturism. No n à basté le dificolté del ristruturé na cèsa nten paisc senza na strada che pòbe prò n camion per i materiai, senza aiuc che, de segur, n Provincia de Bolśán i assa ciapé, pùrche i tourne a abité n paisc oramèi desmentié.

Adess ence la strada sarada, per chi sa cotánc de meisc, i à fat sprelongé la fin dei laour e l scomenciament de sua ativité. I é restèi con sue trënta cioure, con suoi animèi. Ence lori i no vòl lascé l paisc. A chësta mòda, se spera, i enc competenc, Comune, Provincia, Region, i mossarà se spazé a ciapé na soluzion ( i finanziamenc ), per fè a na mòda che la strada vegne refata. Senza fossa sté l prigo che i dighe: “ Ben adess la jent no l’é ilò, podón se la ciapé saurida”.

Ma ntratánt sto invièrn sarà difizile se sposté. Sarà debujen de motoslitte e de autri mesi. Cosć mplù, per chi che bele vif na situazion difizile. Per chëst l’Union dei Ladins da Fodom l’à giourì n cont corent a la Cassa Raiffeisen de la Val Badia, filial de Rèba, numer 6006965 ABI 08010 CAB 61170 causal “ Sotscrizion Vijiné de Là”. Se podarà spò contribuì a daidé chëste persone. A la fin dut chël che vignarà trat su, l vignarà consigné a chi de Vijiné de Là per curì le speise de benśina e de chël che i à douré per i colegamenc.

L envìt l é de dé na mán a chësta popolazion de la Ladinia, che passarà n invièrn coscita difizile.


 
Liams emparentés
· Deplú sun l tema Desvalives
· Chier te noeles


L articul plu liet te chest tema Desvalives:
Aiut Alpin Dolomites: sajon da d'isté dant porta


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.335 seconc