benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Aiut Alpin Dolomites: sajon da d'isté dant porta
scrit ai 03 June 2004 da les 11:12:16 da noeles

Desvalives

 

L Aiut Alpin Dolomites á sen n sie joler

Al se trata de n "EC 135 T2”, n joler con 1600 ciavai, fat sun mesura per l Aiut Alpin Dolomites - La traina con la provinzia da Bulsan: na comiscion de esperc ova aconsié n contribut de 60 euro al menut de jol, la provinzia da Bulsan vuel demé nen dé 50

L'organisazion de elisocours Aiut Alpin Dolomites à n  joler nuef. Ala se trata de n EC 135 T2 dla Eurocopter, n joler a does turbines con complessivamenter 1600 ciavai. Ruvé adalerch é l joler de mei, an à ence bele fat eserzitazions empera. Sen é la daurida dla sajon de prum aiut dant man. L Aiut Alpin à speté dut adum zirca n ann per giaté la mascin: l joler é gnù fat sun mesura per l Aiut Alpin Dolomites. Imatricolé él gnù ti Paisc Todesc y nia tla Talia. Ajache l joler é maiour co l B 3, àl lerch tl abitacul doi feris - n vantaje dantaldut d'invern pro i intervenc sun les pistes. Les sentes te joler pò gnì spostedes a na moda da otimisé la lerch aladò di debujegns. A l'avanguardia é ence i sistems de navigazion y de control dla mascin.



L Aiut Alpin ova messù baraté joler aladò dla lege che preveid n joler a does turbines. Enscì s'àn destaché dal B 3, l'ultim model a una na turbina, n model dret apriejé per sia arvenibelté tles montes. Spo s'àn empresté l EC 135 - les esperienzes con la mascin é stedes cotant mioures co che an n'ova araté - n cert pessimism ova Rafale Kostner defat lascé audì. La mascin nueva che an à sen é n model con plu prestazion: l T 2 dl tip EC 135 dla Eurocopter che à 300 ciavai deplù co l'EC 135 che an s'ova empresté tl'ultima sajon da d'isté y te chela da d'invern. Enscì àn ence potenza assé per laoré tles montes. N problem dai jolers a does turbines é che la segurté che dess gnì garantida da les does turbines vel demé per raions albas: tles montes, olache al é manco ossigen tl aier y la prestazion dles turbines é mendra, ne cleca un n motor nia per tegnì tl aier l gran peis de n joler a does turbines - les normes de segurté porta enscì segurté dantaldut tles planures, ma nia tles montes. L'EC 135 en dotazion al AAD à n sistem de control che aumenteia la prestazion dla seconda turbina tl caje che una essa da tomé fora - enscì ciàfien da arvene l joler con demé una na turbina ence a n'auteza de 2.000 metri.

La novité: joler compré nuef
Per l prum iade à chesta organisazion enscí compré n joler. Denant se l'òven empresté. Ajache l costiment de emprest é dret aut, s'àn empensé  na soluzion che sie n investiment y nia demé scioldi spenus. L Aiut Alpin à tout su n gran emprest per la compra, emprest che n’é nia sté tant saurì da giaté, nia per ultim ajache al rodova y roda notizies sun les intenzions dl President dla Provinzia de Bulsdan Luis Durnwalder da i sourandé l elisocours ai studafuesc - endò n iade n’idea plu politica co funzionala, n’idea plu tla logica dl clientelism politich co tl interes dl ferì che adora aiut. Se làscel endò adentene l’intenzion da sofoié ju l Aiut Alpin Dolomites? Al n’é che ne veid dutaorela nia gen chesta organisazion de prum aiut.
Valch ombria à ciamò la chestion dl finanziament dl'ativité. Tla convenzion per l’elisocours, arjonta do truepes bataies politiches y polemiches ti media che ne i à nia porté onour a l’aministrazion publica dla Provinzia de Bulsan, fòvel vegnù fissé na soma al menut arateda sun l joler B 3; con l joler a does turbines vegn i cosc’ scialdi maiours. Na comiscion ova aconsié 60 euro al menut de contribut dla man publica; l govern provinzial endere à fissé l contribut a n valch plu de 50 y valch euro (i jolers dla Crousc Blancia costa perauter cotant deplù). Sce an à na comiscion de esperc, ciuldì pa nia respeté cie che ala dij? Ma sce an fej empò cie che an vuel, ciuldì spo damané les comiscions? (Mateo Taibon)

N valgunes imajes dl joler a d'auta ressoluzion (ca. 700 kb) - copyright by Mateo Taibon 2004:


 
Liams emparentés
· Deplú sun l tema Desvalives
· Chier te noeles


L articul plu liet te chest tema Desvalives:
Aiut Alpin Dolomites: sajon da d'isté dant porta


Valutazion dl articul
Cumpeida mesana de oujes: 5
Oujes: 7


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.358 seconc