Encuei (23.05.2004) él sté festa grana a Badia a onour dl Sant Ojöp Freinademetz da Oies (declaré sant en l ann passé ai 5 d'otober a Roma, prum sant ladin tla storia), con messa alalergia conzelebreda dal vescul Wilhelm Egger y 60 prevesc dant a na fola che ne essa nia abú lerch, nience tla gran gliejia de Badia. L temp da soredl y l scenar aisciudil con pres verdienc y i creps ciamò coris de neif fajova da cornisc. 

Sons da festa é vegnus portés dant da la mujiga de Badia con si 60 musicanc sot a la bacheta de Fridl Pescoller.  N auter gran ton da festa é vegnú sport per la gaujion  dai 300 ciantarins y ciantarines de duta la Val Badia. Ai á porté dant sot a la bacheta de Ulrich Willeit y de Iarone Chizzali na messa ladina nueva metuda adum dal corist dl dom da Bulsan, Herbert  Paulmichl. Na gran meja de jent s'á fat permez, dai paisc vejins desche Lungiarü, La Val, La Ila y San Ciascian ésen vegnus con crousc da doman adora. La seira denant él gnú fat na gran lominaria a Badia con de vigni sort de scrites a onour dl sant defora entourn tavela, su per les temples dl paisc y sun i vieresc dles ciases. Passa 700 volontars se à festidié dl'organisazion. Endò n iade án podú sentí tant che al ti sta cuer al vescul da ti rejoné ados a la jent per ladin de chel che al ne se desmentia mai, nience fora dles valedes ladines te de gran gaujions festales.I pelegrins é vegnus acompagnés da n pice sfuei trilingh (ladin-talian-todesch), metù adum da Tone Gasser y da Paolo Anvidalfarei, con laite i saluc, les letures di vagnelesc, les cianties y les orazions. Les festivités y les ocurenzes a onour dl Sant va inant entratant les proscimes edemes con messes, cianté les vespres, funzions te gliejia a San Linert, tla gliejia dlongia la ciasa Nadel dl Sant sa Oies y con conzerc de mujiga classica.  En sabeda che vegn, ai 29 de mei tegnirá conzert a onour dl sant l cor di ciantadours y l'orchestra dl dom da Persenon da les 21.00 te gliejia. Badia ilumineda (foto: Usc di Ladins).

Curta biografia dl Sant:

http://www.noeles.net/modules.php?name=News&file=article&sid=404

Ence l sit dla diozesa de Bulsan-Persenon á sourantout n articul de noeles.net soura l Sant da Oies:

http://www.ecclesiabz.com/presse/freinademetz/freinademetz_biografie.htm#ladinisch