benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La Val Venuost y sia arpejon ladina/retoromana
scrit ai 15 May 2004 da les 07:48:24 da noeles

Storia

 

"L rondení  de temps passés"

Tla Val Venuost rejónen aldidancuei todesch, ma dlonch úrten l passé ladin/retoroman,  i toponims rejona dutaorela chest lingaz

"Quadres, Maletes, Astrals, Plavina, Cristanes, Plangrand, Plandalais, Fasses, Plambel, Pra Lombart, Planatsch, Sponda, Planvert, Valdapetsch, Foppa, Ganal, Sesvenna, Spinei". Lascian rondení dantfora l son de en valgugn toponims venostans de clera derivazion ladina-romana, che nes sona ence a nos dret familiars, él ai 14 de mei vegnú metú en ona sun l Sender Bozen n program dret interessant con trueps detais storics dal titul "Auf den Spuren des Rätoromanischen im Vinschgau" (Les fusties retoromanes tl Venuost) dl storich y fotograf Sebastian Marseiler.  L film é vegnú fat sun enciaria dl museum Venostan y dla RAI todescia. Desche al é saurí da vedei da la toponomastica s'á l lingaz retoroman o ladin mantegní enfin al 18-19eisem secul te chesta valeda che se desten da Maran enfin al pas dal Raisc, conesciuda aldidancuei per sies gran desteises de pomés. Sce an la tol avisa, ne é l ladin enfin aldidancuei nia svaní daldut. Tla Val Müstair, na val laterala dl Venuost che peia via da Gluorn/Glurns, végnel dutaorela rejoné ladin-retoroman che corespon dessegur plu o manco a chel che an rejonova zacan te dut l raion venostan, ne él pu degun confin geografich danterite. N cheder de Gluorn/Glurns.



Chesta valeda aud endere pro la Svizra é sta viadedò l confin, n fat che á porté pro dezijivamenter a sie souravive. En valgunes cosses dl film se merita de vegní recordedes, davia che ales ne é nia tant conesciudes: te doi paisc, a Damal/Mals y a Raisc/Reschen, él dutaorela does ciampanes che reporta de curtes iscrizions rumances "en l'an" y "S. Maria prege per nos" (..preia per nos). Na tradizion particolara che se á mantegní y che colieia l raion con l Grijon y l Friul é l "Scheiben-schlagen" (tré les sceibes), na tradizion dutaorela viva tl Friul" (tirâ las cidulas) y documenteda ence tla Val Badia enfin al secul passé dal degan Jan Matie Declara. Tla Val Venuost ésen en pert coscienc de chesta arpejon y an chier tres deplú l contat con i vijins do confin tla Val Müstair, apeina 7 km dancialá da Gluorn/Glurns, ence per se lascé splié cie che valch toponims o paroles vuel dí desche la scola da Graun che á metú adum n liber di toponims dl luech ("Graun" dal ladin "corona/crona", desche te Plan de Corones). Valch un, desche l ombolt de Damal/Mals, á ence emparé l lingaz rumanc.

Nia demé tla toponomastica, ma ence tla maniera de rejoné l dialet todesch aldidancuei tl Venuost giáten fusties: tla valeda ál messú vegní rejoné per n temp lonch sie rumanc/ladin che todesch, davia che demé enscí pòn se splié certes formes tipiches de lingac mescedés, sco l "creol" o "pidgin", chest vel p.ej. per l'adoranza dl datif y dles formes verbales "tat" y "hat" per schivé l congiuntif. Ence tl vocabular pauril y familiar giáten fusties: "der Waal" (=aghel, per arvene l'ega sun i ciamps, aual per rumanc), "die Rod" (la roda), "tutschen" (tucela - jí a dormí), "tschupfen" (ciufé), "mantschen" (mangé "dut endoblet"), "grattln" (gratoné) y e.i. Canche l todesch á abù la souraventa él rie da dí, davia che al é pueces anotazions scrites de chest vers. Tl 15eisem secul fova l ladin/rumanc ciamò lingaz dant signoria a Gluorn, na cité zenza a maioranza todescia a desvalivanza de Damal/Mals atira dlongia, desche an pò lieje te na anotazion che fova ascognuda te n cuertl de n liber y ciateda per caje a Castelbell. Dessegur él che tlaruveda entourn l 16-17eisem secul ésen passés a na politica de todeschisazion plu sistematica tres gliejia y scola. Entratant i agn dla reforma tl 16eisem secul, canche l'Engiadina é passeda al protestantejim/calvinism, án spo scombatú l rumanc/ladin ence per gaujes religiouses, dantaldut da la claustra de Munt Maria/Marienberg enfora. L lingaz á endere ence souravivù aluesc chisc temps, anter i paurs y la jent scempla, y an arata che al se ae destudé via definitivamenter desche lingaz vif al scomenciament dl 19eisem secul, i toponims endere le rejona ciamò tres inant.

Na merscia particolara dl Venuost y de sie passé: les beliscimes gliejies romaniches.

 

 

 

 

N projet de colaurazion soura i confins anter Venuost (I), Engiadina-Val Müstair (CH) y Auta valeda dl Inn (A), l triangul Retich:

http://www.interreg-mrd.org

N valgugn fac storics ciáfien ence da lieje tl sit:

http://www.vejin.com

 


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.391 seconc