Pai infermîrs forescj savê fevelâ un pôc di furlan al vûl dî jentrâ miôr tal ambient di lavôr e concuistâ la fiducie dai malâts, pai miedis al vûl dî metisi plui in contat cui pazients, insumis scurtâ lis distancis. Chestis lis mutivazions plui fuartis par sburtâ un progjet par inserî la lenghe furlane intai ospedâi e intai ambulatoris regjonâi. Un contribût di 208.550 euros su la fonde de legjislazion pe tutele des lenghis minoritariis al coventarà ae Ass dal Friûl di Mieç par realizâ une gnove cartelonistiche, cors di formazions par miedis e logopediscj, une cunvigne, guidis pai servizis a pro de salût mentâl e pe sigurece sul lavôr e altri ancjemò.

Referents dal progjet a son Guglielmo Pitzalis, Paolo Di Benedetto, Mario Novello e Giorgio Blasich, in colaborazions cun altris Aziendis sanitariis, la Provincie di Udin, i sindacâts e l'Irccs Medea La Nostra Famiglia.
Dongje dal furlan, tes zonis di pertinence a vegnarà doprât ancje il sloven.

Liam internet al sit furlan: http://www.lenghe.net