I neo-Ladins tl Beluneis á sen n sie Istitut

Ti ultims meisc él nasciú doi Istituc Ladins nuefs tla provinzia de Belun: chel di "neo-Ladins" y chel di "Ladins storics"  - Dantenier enaudazion a Borcia de Ciadoura  

de Ernesto Majoni/diretour

A la fin fova dut enjigné y i on propi abù gran plajei de vedei la jent che é ruveda a Borcia de Ciadoura ai 8 de mei domesdí per batié l Istitut Cultural dles Comunités di Ladins storics dles Dolomites de Belun. Con nos fòvel i Capicomuns d’Ampez, San Vido, Borcia, Vodo, l Vize Capocomun d’Ampez, truepa jent de Auronzo, dl Comelich, da Oltreclusa, Selva y dai paisc entourn Egort, da Zoldo y da Zopè. Trueps fova vistis da festa, al fova standardes, la Musiga de Borcia y truepa vueia de sté adum te chesta ocajion emportanta: l batum dla Ciasa dla cultura ladina de duta nosta Provinzia.

Do i saludesc dl Capocomun de Borcia, dl President dla Comunité Montana, dl Assessour al Turism dla Provinzia, dl President dl Consei Provinzial y dl raprejentant provinzial dles mendranzes, él vegnù zonché la cordela y l plovan de Borcia à benedí l Istitut, loghé al prum plan dla Ciasa dla Comunité Montana. I on mostré ai aministradours, ai presidenc dles Unions Ladines y a truepa jent che s’endeleta de cultura y rejoneda ladina y che ova azeté de bona saour de vegnì a fé na fré de festa con nos, oláche al é l Istitut, a vedei i “logos” nuefs dessegnés da Nicole De Lotto da San Vido y da Chiara, Emily  y Stefania da Egort y i on conté cie che l Istitut vuel fé da sen inant. Do avei fenì l laour per mete adum na grafia dles rejonedes ladines dla provinzia che joe a fé scrive y lieje miec y deplù vegniràl prejenté “Ladin!”, l sfuei ofizial dl Istitut, oláche al sarà laite scritures de linguistica y de storia, fates da les Unions. An rejonará de libri ladins y an ciatarà poesies, scric y teater. L Istitut laora bele da cater meisc y al vuel se dé da fé per se mete a paredl con chi autri, y defene de vigni vers la cultura, la rejoneda y les tradizions ladines agordines, dl Ciadoura de Mez, comeleanes, dl Oltreclusa y zoldanes.