N invern da record: 14% plu sciors sun les pistes dl Adesc Aut
I sciors talians fej fora la majera pert: 648 000 talians, dedò i todesc con 473.000 mile aruvedes
Dret content se à mostré te chesta sajon l ram turistich a revert les zifres dl turism da d'invern che é judes bendebot suvers, + 14%, anter chisc spizes pro i sciors che vegn adalerch dal Benelux. L assessour al turism, Thomas Widmann, é dla minonga che chisc resultac desmostra che an se à astilé dret a se daurì a marcés nuefs te chi che al é da abiné l davegnì turistich. Colfosch, streda devers Frera. La neif ne á nia mancé chesta outa.
51.000 sciors dal Benelux é anter dezember y fauré vegnus te Südtirol, 13.000 deplù che tl medem temp tl ann passé. Chisc sciors fej fora l cinch percent dles souranuetes entratant l invern. Pro i marcés prinzipai di Paisc Todesc y dla Talia él tamben vegnù registré n aument. Enscí fej fora la gran pert dl turism da invern tl Adesc Aut con 648.000 aruvedes i talians, seghis dai todesc con 473.000 aruvedes anter dezember y fauré. Dut adum àn arcumpedé te chisc trei meisc n aument de 87.000 prejenzes de talians y de 73.000 todesc en confront al ann dant. La marevueia é aladò de Widmann che ence clienc da la Svizra y da l’Austria, enstesc raions da schi, vegn te n numer tres majer entratant l invern tl Adesc Aut. Chest ann él vegnù cumpedé 24.000 persones da l'Austria y de 13.000 da la Svizra, n aument de 2.000 y 1.000 persones en confront al ann passé. L svilup dl turism da invern é da vedei enscí de bon uedl. L aument di sciors che é ruvés adalerch é de 14% y pro la cumpeida dles souranuetes + 9 % sun duc i marcés, desmostra che la varieté piteda te Südtirol entratant l invern mantegn i vedli clienc y nen fej vegnì de nuefs. Les cumpeides enfin a fauré va devers a n invern da record. Con chestes bones prospetives él da se aspeté n bon svilup dl turism desche al é suzedù tl ann 2003. (osp, ls/if)
