benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Politica Ladina: cie él pa vegnù arjont?
scrit ai 26 April 2004 da les 18:46:01 da noeles

Politica

 

La Generela se meritassa n gran reconesciment

Durnwalder ova dant les lites envié duc i ombolc te sia "Cianeva" a Laimburg, do les lites dut chiet endò

de Lois Trebo

Sce an conscidreia la politica che vegn fata dai ladins, spo pòn ben dì che zeche se muev, ma an mess se damané, olache an é ruvés te 5 agn, sce al é gnù arjont valch y per chi. I ladins dla provinzia da Bulsan y da Trent à podù se mete sun l ciapel de pices plumes. Sie raprejentant ladin é gnù cherdé a fé l assessour.  N secont raprejentant ladin essa l dert da gnì vizepresident dal Consei Regional y Provinzial. La enciaria da president podessa n ladin demé sourantò, sce i talians o i todesc s'en desdijessa de chest post; che ai feje na tel cossa, pò i ladins dessegur se somié. Miscion arjonta: dant les lites enviova Durnwalder i ombolc ladins tla Cianeva dal Vin a Laimburg. Ala ti é garateda da mené tres Mussner, adoran la cherdeda da foradecà desche sautadour. Dedò ne àl cherdé plu degugn da foradecà.



Ala fossa pu juda da i garantì derc valifs ai ladins, ence l post da president, sce an essa volù. L medem essa ence i ladins da Bulsan giaté n certl lital aposta desche i fascians à, sce i ladins dla SVP l essa ghiré. Chest é n fat che desplej dret, ajache a chesta moda éssen podù i garantì ai ladins does lueges a Bulsan y i candidac ladins n'essa nia plu bria da reflé ju dut Südtirol a petlé oujes. Na pert miena tres che i ladins vele deplù, sce ai mess partì dut con i todesc y ne s'anadà nia che ai la empaia demé soura.

I ladins da Souramont à endò dut d'autri problems. Feter 40 comuns dla provinzia de Belun s'á declaré ladins per nen aprofité dla lege nazionala sun la sconanza dles mendranzes. Demé che i ladins storics ( Fodom, Col y Ampez ) vegn a tré alacurta per l fat che ai mess partì i scioldi con chisc neoladins. Tant inant che i ladins da Souramont volessa gnì pro Südtirol él rie da dì, i comuns scouta plutost chiec. Durni é ben jù via Ampez a saludé l ombolt y à envié ladins da Souramont ju tla gran cianeva da l vin sot l crep ite; plu che de beles paroles n'él da entramesdoes les encontedes nia sauté fora. Vigni mendranza à empruma bujegn de n sostegn politich per cresce deplù adum. L'identité se renforza empermò can che la popolazion é plu patrona de sia cultura, de sia storia, de sie lingaz. Chest audissa endlonch da giaté plu peis tres  sia adoranza te vigni ciamp.

 

Tost saràl les lites comunales viadelà da Ciaulonch. Al é dret emportant chi che gnirà ombolc, ajache i ladins da Souramont adora n gran sostegn da pert dles aministrazions comunales per  defene sia identité defront ai neoladins, per arjonje l'istruzion dl ladin te scola; i mutons mess emparé endertura da rejoné y da scrive sie lingaz dla oma; demé enscì gnìssel schivé che l ladin ne se bastardassa nia con paroles forestes che dezipa l ladin. L'adoranza dl ladin tles aministrazions, na prejenza sterscia ti media ladins, crié posc' de laour te sie paisc, laoré adum con i autri ladins entourn l Sela: chisc fossa ponc d'ativité dla aministrazion comunala che daidassa salvé la carateristica de nosta jent. Sce altamo la maioranza di ombolc sentissa i problems culturai ladins, spo podessa na enconteda de chisc 18 oms ester utla per renforzé l' idenité ladina. Na tel enconteda mess gnì enjigneda ca, assoulceda con deplù sentedes anter puec ombolc o assessours a la cultura y ala mess avei n orden dl dì cler. An mess se mete dant cie che an volessa arjonje, ciuna che é la finamira dla enconteda.

 

Duc chisc agn à la Union Generela con sie foliet ladin daidé pro che i ladins ne se vive nia ciamò deplù endalauter; perchel se meritàssela n gran reconesciment da pert dles aministrazions politiches. Deberieda - unions culturales y aministrazions comunales - jìssela cotant plu saurì da porté a bon termen i trueps problems ladins per bolì adum la familia ladina che manacia da zessé tres deplù endalauter. I essan demé bria da tò n ejempl dai todesc de Südtirol, co che an fej per valuté y renforzé sia popolazion, l lingaz y la cultura dla mendranza.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Politica Ladina: cie él pa vegnù arjont? (ponc: 1)
da travers ai 27 April 2004 da les 09:23:59
(Infos sun l utilisadour | Ti mané n messaje privat)
De beles paroles cheles de Lois Trebo ma ales sona n puech sciche na ousc che scraia tl desert. Ne éla nia enscì che ai Ladins, ence a chi de Souramont, ti bàstel n bon got de vin, tla cianeva a Laimburg o autrò?


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.363 seconc