benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladinia: vera anter les valedes
scrit ai 20 April 2004 da les 16:12:10 da noeles

Politica

 

Les priorités de Mussner: la mendranza todescia tla provinzia de Trent

Florian Mussner fej vijita ai Mocheni y ai Zimbresc - Al fossa bel, sce al essa la medema prescia per i ladins, ma de chest vers chiet assolut

Teniade végnel a lum i mocheni y i zimbresc, mendranza de sclata todescia tla provinzia de Trent. Florian Mussner é al moment ence assessour regional per les mendranzes linguistiches y sie prum at te chest vers é steda la vijita ai ombolc di paisc mocheni y zimbresc. Al é dessegur sie dovei emparé a i conesce y audí dretamenter da ei i majeri problems. Al vegn endò dit, desche bele plu iadesc, che al é priorités da respeté. Recordondenes endere che mendranza linguistica é ence i fascians con si problems. Ma persoura chisc nience na parola. Fascians fej rima con talians y chest sona mel a les oredles de Mussner che s'à bele baudié publicamenter che sie colegh Chiocchetti rejona massa talian. Bele cotant de meisc dant les lites dl 2003 fòvel vegnù rejoné, sun proposta de Durnwalder, de mete su n comité interladin per crié na colaborazion concreta anter dutes les valedes entourn l Sela via. Erwin Valentini, entusiast dla proposta, ova envié a le mete su ciamò dant les lites, ajache dedò fòssel vegnù dut cant desmentié via. Al à abù rejon. Degugn ne rejona plu.  



Vigni mendranza à l dert de vegnì respeteda y daideda, belunfat cie sort de lingaz che ala rejona. Ma te chest caje àn propi l'imprescion che l orden dles priorités depene dal fat che la mendranza en chestion é todescia. Aladò dl comunicat dla Region végnel rejoné de de gragn projec per promueve l svilup economich y sozial dles valedes di mocheni y di zimbresc, souradut per daidé la joeneza a resté sun l post. Chesta é la condizion "sine qua non" per mantegnì ti joegn l sentiment dla identité y de sie lingaz. La Region é giustificheda a crié projec te chest vers, projec che ti plej a la jent. An dess perchel brancé ite atira y ne perde nia temp con na burocrazia massa longia. La sconanza dles mendranzes é dessegur ben segureda a livel giuridich, ma al ne n'é nia vegnù fat, tl caje dla mendranza mochena y zimbra, i drec varesc per ester a livel di temps d'encuei, souradut per cie che reverda la cualificazion dl'agricoltura, di servisc, dutes cosses che dess vegnì miorés per crié posc de laour y la vueia de resté sun l post. Dut chest samben con i dinés dla Region y con chi dla provinzia de Trent, olache perauter Mussner ne pò nia comané.

Ala se trata de na bela sburla a la Region perchel che ela deide les does mendranzes. Indretamenter ence n scibl al president Dellai che al anuzeie la prejenza dles mendranzes per ghiré plu autonomia provinziala.

L intervent de Mussner pro Mocheni y Zimbresc é da laudé y al fossa bel sce al essa la medema prescia ence per i autri problems, souradut per cie che reverda la mendranza ladina en general.

Al é ben veir che Mussner à cherdé ite i ombolc y i responsabli dl turism de dutes les valedes per traté l problem di joufs, co i saré ju. Na cherdeda voluda souradut dai gherdeines y dai badioc per si interesc: la maratona y d'autres manifestazions che se damana na scluta di joufs selans ai mesi motorisés. Contra chesta proposta à protesté Danilo Dezulian y dant da n per de dis l comun da Fodom, desche an pò lieje chilò dessot. Al Comun da Fodom àn responù, dessenés y con intenzions de boicoté la colaborazion tl davegnì, Rudolf Mussner, diretour dl consorz turistich de Gherdeina y Hubert Dalponte, president dl'assoziazion turistica de Corvara-Colfosch. Ai ti fej l mul, l cef a chi da Fodom, ajache chisc ne n'à nia atira dit de sci a les ghiranzes de Badia y Gherdeina. Les reazions de chi da Fodom, che se baudia de ne n'ester nia vegnus damanés sun la scomenciadiva dla Maratona y de avei messù sté a cialé pro con danns ne ti scusa nia ai badioc y ai gherdeines che miena d'ester "Uber alles". Sen se damànei l intervent dl assessour Mussner. Mussner dess naouta se informé, audì trames les ciampanes y daidé ence i debli y no demé i rics y i todesc. La cossa é dassen delicata, ajache an manacia de scarzé su per dagnora la colaborazion pratica y concreta anter les valedes ladines. An é dant  na ocajion de dialogh interladin per realisé valch de concret a livel economich-turistich y an manacia de ruiné dut cant dantfora, ajache valgugn vuel dut y ne vuel nia zede. Al é natural che l debl se lascia su.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.374 seconc