Ejempl Maratona dles Dolomites: laudeda tla Val Badia, desprijeda ta Fodom
I Fodoms à dit nò a scluje i joufs per manifestazions ziclistiches soura i joufs entourn l Sela desche raprejentanc de Badia y de Gherdeina volessa
de Lorenzo Soratroi
"La rejon n'é mai duta da una na pert" dij n vedl dit. Enscì éla ence tla chestion dla contrarieté di ostiers de Reba de saré i joufs ai 8 de messel. An ne pò nia nié che sun la discuscion entratant la reunion de enstadì con i raprejentanc de Badia, Fascia y Gherdeina, ael pesé y nia puech, la chestion tres daverta dla Maratona dles Dolomites. Da canche al’é nasciuda é chesta manifestazion tres vegnuda veduda ta Fodom desche na imposizion, n sfrutament (ence dla pazienza dla jent) zenza degun tournacont. I Fodoms é stufs de messei soporté manifestazions dles autres valedes che ruva te sie teritore, zenza nen avei valch dancialà.
Recordondenes che per ejempl ja la Ròcia ti ài nié a la Maratona dles Dolomites de passé en chel dì, davia che ai met a jì per les stredes dl paisc na gran desfileda con guanc da zacan. Enscì passa la gran pert dla Maratona sun les stredes de Fodom che vegn saredes per en valgunes ores al dì. Valch ostier met fora tofles con scrit "Sclut per Maratona" y truepa jent s'en jarà en chel dì foravia. Cie nen dì? Dessegur éla juda en pue miec ti ultims agn con l’organizazion; an sa dantfora can che les stredes vegnirà saredes, valch végnel fat vedei tres la televijion ence de Fodom. Ma dut ciamò massa puech en proporzion al "peis" che duta la val mess soporté per chesta gara. En l'ann passé se à enchinamai "descomodé" siour plovan da la Plié, mons. Alfredo Murer, che ti à scrit na letra al capocomun per che al tole provedimenc decontra. I operadours turistics à capì che oramai ne ciafiaràn nia plu da se paré a fè a na moda che la gara ne passe nia ta Fodom. Ma spo sce les vals ladines dl Sela y la Val Badia en particolar, vuel che Reba desmostre plu colaborazion, fosc fòssel ora che ales deure deplù i "cordons dl tacuin" ence eles: Plu vesibelté en termens de promozion turistica, poscibelté de ester pert ativa tla organisazion y e.i. Chest végnel damané da agn y fosc a chest pont ence con rejon. Da l'autra pert dij i ostiers de Reba che saré i joufs per ei vuel dì perde la clientela de chi da les motos, che chisc clienc é vegnus clamés chilò entourn bele da agn y sen rùvei da mesa Europa. Da Badia, Gherdeina y da Fascia ca él ruvé raprejentanc che à porté na idea da descore fora, a na moda che an posse valuté les conseguenzes dantfora. Ma a chi ti él pa vegnù damané sce al fova endertura porté chilò dentourn milesc y milesc de motos vigni edema che sferaceia su per les stredes? A damané i ostiers a chi che viv dlongia na streda, sce ai é a una de soporté per doi meisc alalongia, l crabal dles motos? E chi che mess fé vigni di con l’auto la streda de n jouf con la poura che valch moto sclute ite?
